Ким Чен Ын армийн ротын командлагч нартай зураг авахуулахдаа байлдааны бэлэн байдлыг хангахыг уриалав

Хойд Солонгосын удирдагч Ким Чен Ын ротын командлагч нарыг сургалтаа эрчимжүүлж, байлдааны бэлэн байдлаа сайжруулахыг уриалж, үүнийг тэдний «нэгдүгээр зэргийн хувьсгалт зорилт» гэж нэрлэсэн гэж тус улсын төрийн хэвлэл лхагва гарагт мэдээлжээ. Энэ тухай Ёнхап агентлаг мэдээлэв.

Солонгосын Төв мэдээллийн агентлагийн мэдээлснээр, Ким мягмар гарагт Солонгосын ардын армийн ротын удирдагчдын гуравдугаар зөвлөгөөний оролцогчидтой зураг авахуулахдаа ийн хэлсэн байна. Түүнтэй хамт Солонгосын ажилчны намын Төв цэргийн комиссын дэд дарга Пак Чон Чон, Батлан хамгаалахын сайд Ким Сон Ги, армийн Жанжин штабын дарга Ри Ён Гил нар байжээ.

Агентлагийн мэдээлснээр, Ким ротын удирдагчдын нэгдүгээр зэргийн хувьсгалт зорилт нь ангиа дайнд бүрэн бэлэн болгох явдал бөгөөд үүнийг хэрэгжүүлэх арга зам нь хүнд, эрчимтэй сургалтыг эрс сайжруулах явдал гэж хэлжээ. Тэрбээр тэдний үнэнч байдал, удирдах чадвар ангиа хувьсгалт итгэл, эх оронч сэтгэл, үлгэр жишээ баатарлаг зориг, байлдааны үр нөлөөтэй нэг нь зуутай тэнцэх цэрэг болгосон амжилтаар илрэх ёстой гэжээ. Хүчирхэг арми байгуулах ирээдүй «тэдний ачаар асар гэрэлтэй» харагдаж байна гэж Ким нэмж хэлэв.

Ким 10 дугаар сарын 22, 23-нд Пхеньянд болсон зөвлөгөөнийг даргалж, командлагч нарт хамгийн хүчирхэг ротуудыг бэлтгэх замаар хамгийн хүчирхэг армийг байгуулж, солонгос маягийн цэргийн хувьсгалыг хурдасгахыг үүрэг болгосон юм. Мөн армийн намын арми, үзэл суртлын арми гэсэн жинхэнэ мөн чанарыг тууштай үргэлжлүүлэхийг тэдэнд даалгажээ. Агентлагийн мэдээлснээр, энэ нь 2 дугаар сард болсон намын есдүгээр их хурлаас хойш нийт армийн анхны цуглаан байв.