Этиопт бие биедээ хайртай мэт бух, илжгийг судлаачид ажиглажээ

Этиопт экспедицид явсан Италийн Пизагийн их сургуулийн аспирантууд бух, илжиг хоёрын ер бусын холбоог ажиглажээ гэж Медуза сайт мэдээлэв.

Андре Бейран да Круз, Мартина Франческони нар өөр өөр эзэнтэй, нэг бэлчээрт бэлчдэг хоёр эр амьтныг найман өдрийн турш ажиглаж, бух илжиг дээр 51 удаа авирсныг тэмдэглэсэн байна. Мөн бие биенээ долоож, илэх зэрэг найрсаг зан байдал анзаарчээ.

Судлаачид тэднийг эртний Грекийн домгийн Ахиллес, Патрокл хэмээн нэрлэсэн аж. Хоёр амьтан сүрэг дотроо бие биенээ онцгойлж, ихэнх цагаа хамт өнгөрөөсөн юм.

Бух өөр эр илжиг рүү хоёр удаа авирах гэсэн ч нөгөө нь түрэмгий хариулжээ. Патрокл өөр бухыг хөөж, Ахиллестэй харьцахаас зайлсхийгээгүй байна. Сүрэгт бух, илжгийн өөр ийм харилцаа ажиглагдаагүй.

Нэг хүйсийн амьтдын бэлгийн харьцаа түгээмэл бөгөөд ихэвчлэн албадлага, хүйсээ андуурах, эсрэг хүйсийн хос дутагдсанаар тайлбарладаг. Эдгээр тайлбар Ахиллес, Патроклын тохиолдлыг бүрэн тайлбарлахгүй аж.

«Тэдний хоорондын нийгмийн холбооны хүч эдгээр зардлаас давж байгаа бололтой» гэж судлаачид 11 дүгээр сарын 2-нд Каррент Байолоджи сэтгүүлд нийтлэгдсэн бүтээлдээ бичжээ.

Судалгаанд оролцоогүй Лондонгийн Эзэн хааны коллежийн эколог Винсент Саволайнен энэ хоёр санамсаргүй хос биш гэдгийг судлаачид нэлээд үнэмшилтэй харуулсан гэж үзсэн байна. Эдгээр нь гэрийн амьтан тул зэрлэг байгаль дахь харилцааг тусгахгүй байж болох юм.