Филиппин багш нартаа 170,000 гаруй МакБүүк зөөврийн компьютер худалдаж авна

Филиппиний Боловсролын яам улсын сургуулийн багш, ажилтнуудад зориулж 170,000 гаруй МакБүүк Ниу зөөврийн компьютерийг нийт долоон тэрбум дөрвөн зуун сая песогоор худалдаж авч байна гэж Рапплер сайт мэдээлэв.

Яамны 11 дүгээр сарын 3-нд мэдээлснээр, худалдан авах 172,654 компьютерийн 169,008-ыг багш нарт, 3,646-г захиргааны ажилтнуудад олгох юм.

Компьютерийг 2026 оны 11 дүгээр сараас 2027 оны 3 дугаар сарын хооронд таван жилийн баталгаатайгаар хүргэх аж. Өмнөх худалдан авалтад нэг жилийн баталгаа байсан байна.

«Бид саяхан Филиппиний Боловсролын яамтай Мак компьютерийн боловсролын хамгийн том гэрээгээ байгууллаа» гэж Эппл компанийн гүйцэтгэх захирал Жон Тернус санхүүгийн тайлангийн хурлаар хэлжээ.

«Удаан хугацаанд манай багш нар хичээлийн төлөвлөгөөгөө гүйцэтгэхийн тулд өөрсдөө зөөврийн компьютер худалдаж авах, хуучирсан тоног төхөөрөмжөө арчлах хүнд ачааг үүрсээр ирсэн» гэж Боловсролын сайд Сонни Ангара хэлсэн байна.

Ерөнхийлөгч Фердинанд Маркос бага 2025 онд улсын сургуулийн бүх багшид зөөврийн компьютер хүргэхээ амласан юм. Тус улсад 900,000 орчим улсын сургуулийн багш бий.

Хөтөлбөрөөр одоогоор 231,725 компьютерийн гэрээ байгуулагдсан бөгөөд 62,717 нь Виндовс үйлдлийн системтэй аж. Яам 2027 онд 267,000 гаруй компьютер авахаар Сенатаас санхүүжилт хүсэж байна.

Рапплерийн 2023 оны мөрдөн шалгалтаар Дутертегийн засаг захиргааны үед багш нарт зориулсан компьютер жижиглэнгийн дэлгүүрт зарагдаж байсан нь илэрсэн юм.