Филиппиний Пангасинан мужид хууль бус пиротехникийн байранд дэлбэрэлт болж, таван хүн амь үрэгджээ

Филиппиний Пангасинан мужийн Маласики хотын Табо-Сили баранжайд арваннэгдүгээр сарын 4-ний орой түр барилгад дэлбэрэлт болж, гурван насанд хүрээгүй хүүхэд зэрэг таван хүн амь үрэгдсэнийг Рапплер сайт мэдээлжээ.

Маласикигийн цагдаагийн дарга Франсиско Савадангийн хэлснээр, дэлбэрэлтээс насанд хүрсэн эмэгтэй, хүүхэд хоёр амьд үлдсэн бөгөөд хоёулангийнх нь биеийн байдал тогтвортой байна.

Амь үрэгдэгсдийн дунд 17 настай хүү, 7 настай охин байжээ. Дэлбэрэлт хөрш баранжай, ойролцоох хотуудад сонсогдохуйц хүчтэй байсан ба дараа нь хэд хэдэн дэлбэрэлт дараалан болсон байна.

Оршин суугчид уг газрыг өмнө нь гахайн аж ахуй байсан гэж мэддэг байсан бол шинэ түрээслэгчид гахай үржүүлнэ гэж хэлж байжээ.

Хотын дэд дарга Дариа Мамарил хотын зөвлөлд пиротехникийн үйлдвэр, агуулахын талаар ямар ч өргөдөл ирж байгаагүйг хэлсэн. Цагдаагийн мэдээлснээр, тэнд байрлаж байсан хүмүүс пиротехник үйлдвэрлэх зөвшөөрөлгүй байжээ.

Пангасинан мужийн цагдаагийн газар газраас пиротехник үйлдвэрлэхэд ашигладаг түүхий эд, бэлэн бүтээгдэхүүн, 300 орчим ширхэг квитис пуужинт галт наадам олсон байна.

Дэлбэрэлтийн шалтгаан, хэн үйл ажиллагаа явуулж байсан, хэр удаан ажиллаж байсан нь тогтоогдоогүй байна.