Флоридад хувийн онгоц осолдоход гэрчүүд бөмбөг дэлбэрсэн мэт байсан гэж яаралтай тусламжид мэдээлжээ

Флорида мужид хувийн тийрэлтэт онгоц осолдсоныг харсан гэрчүүд яаралтай тусламжийн 911 дугаарт залгаж, нэг нь “бөмбөг” дэлбэрсэн гэж мэдээлсэн гэж Фокс Ньюс Дижитал олж авсан дуу бичлэгтээ тулгуурлан мэдээлжээ.

Лиржет 60 онгоц 11 дүгээр сарын 1-нд өглөөний 10:37 цагийн орчимд Остин-Бергстромын олон улсын нисэх онгоцны буудлаас Багамын арлууд руу хөөрч, өдрийн 1 цагийн өмнөхөн Палм Бич тойрогт унаж, онгоцонд байсан 9 хүн бүгд амь үрэгджээ.

“Дэлбэрэлт болсон” гэж дуудлага өгсөн нэг эмэгтэй хэлжээ. Түүний хэлснээр, байшин нь доргиж, гадагш гүйж гарахад дэлбэрэлтийн чимээ сонсогдож, цахилгаан нь хэдэн секунд тасарсан бөгөөд оч, утаа харагдсан байна. Дуудлагууд онгоц осолдсоны дараахан буюу 12:51-ийн орчимд иржээ.

Ослын улмаас Остины технологийн бизнес эрхлэгч 45 настай Адам Робинсон, түүний эхнэр 40 настай Хелен Шарп, 4 настай Эмма, 2 настай Чарли хүүхдүүд, хүүхэд асрагч Анита Мария Сетина, Рейчел Рид, Чарми Фер хос болон нисгэгч Жеффри Грегори, Наталия Гаделья Филгейрас нар амь үрэгджээ.

Онгоц осолдох үед Өмнөд Флоридад хүчтэй аадар бороо орж, аянга цахилгаантай байсан тул холбооны мөрдөн байцаагчид цаг агаарыг шалгалтынхаа гол чиглэл болгох юм.

Тээврийн аюулгүй байдлын үндэсний зөвлөл Даваа гарагт онгоцны бүхээгийн дуу хураагчийг олсноо мэдэгдсэн бөгөөд түүнийг Вашингтон дахь лабораторид шинжлэх юм.