Франц: Супермаркетуудын хөргөлтийн системд хийсэн кибер халдлагыг Ираны Хувьсгалт гвардийнхан үйлджээ

Аравдугаар сард 700 орчим жижиглэн худалдааны супермаркетын хөргөлтийн системд хийсэн кибер халдлагыг Ираны Исламын хувьсгалт гвардийнхан үйлдсэн гэж Францын засгийн газар энэ долоо хоногт дүгнэжээ.

Францын Гадаад хэргийн яамны арваннэгдүгээр сарын 10-ны мэдэгдлээр, хакерууд аравдугаар сарын 11-ний шөнөөс аравдугаар сарын 12-ны үүр хүртэл 700 гаруй худалдааны цэгийн хөргөлтийн системийн удирдлагын төхөөрөмжид халдаж, хүнсний бүтээгдэхүүнийг муудуулжээ. Хохирлыг хэдэн арван сая еврогоор тооцож байна.

Францын Үндэсний кибер аюулгүй байдлын агентлагийн мэдээллээр, халдлагын улмаас дор хаяж 15 удаа галын дохио өгсөн байна. Халдагчид гэсгээх тохиргоог өөрчилж, хөргөгчийн температурыг хэвийн бус өндөр болгосноор худалдаачид бараагаа хаяхаас аргагүй болжээ.

Францын засгийн газар халдлагыг Ираны Хувьсгалт гвардийн “Шахид Каве” кибер халдлагын нэгжтэй холбож байна. Гадаад хэргийн сайд Жан-Ноэль Барро уг халдлагыг Францад урьд өмнө байгаагүй цар хүрээтэй, түрэмгий хорлон сүйтгэх ажиллагаа хэмээн тодорхойлоод, Европын түвшинд хориг арга хэмжээ авахыг санаачлахаа мэдэгджээ.

Бельги, Ирланд, Швед, Финланд, Эстонийн супермаркетууд ч хөргөлтийн системдээ кибер халдлага болсныг мэдээлсэн. Гэхдээ эдгээр бүх халдлагыг Ираны хакерууд үйлдсэнийг нотлох баримт одоогоор алга.

АНУ-ын Сангийн сайд Скотт Бессент арваннэгдүгээр сарын 12-нд Мэрилэнд мужид болсон Heritage сангийн “2026 форум”-д Хятадын хиймэл оюун ухааны загваруудын аюулгүй байдлын талаар ярихдаа энэ халдлагыг жишээ болгон дурджээ.

“Францын 150 хүнсний дэлгүүрийн хөргөгчийг унтраасан тухай мэдээг энд байгаа хүмүүсээс хэн нэг нь үзсэн эсэхийг мэдэхгүй. Тэнд Хятадын загвар ашигласан. Энэ бол хамгийн муу хослол байх: Хятадын загвар ашигладаг иранчууд” гэж Бессент хэлэв. Гэхдээ Ираны хакерууд Хятадын загварыг хэрхэн олж авч, ашигласныг тэрбээр тодруулаагүй.

Сүүлийн үед хэд хэдэн байгууллага Хятадын хиймэл оюун ухааны загваруудын талаар анхааруулж байна.

Хакерууд энэ оны 8-9 дүгээр сард Хятадын DeepSeek болон Жипү GLM загваруудыг ашиглан дор хаяж 19 байгууллагад 25 удаа халдаж, тэдгээрийн 10-т нь зөвшөөрөлгүй нэвтэрсэн эсвэл мэдээлэл хулгайлсан гэж АНУ-ын Palo Alto Networks компанийн Unit 42 баг арваннэгдүгээр сарын 12-нд гаргасан тайландаа дурджээ.

Өөр нэг кибер аюулгүй байдлын компани CrowdStrike-ийн судалгаагаар Хятадын VAPOR PANDA хакерын бүлэг DeepSeek болон хиймэл оюун ухааны агентуудыг ашиглан дэлхийн 200 гаруй байгууллагад халдсан байна.

The Information сайт арваннэгдүгээр сарын 12-нд нөхцөл байдлыг мэдэх гурван эх сурвалжид тулгуурлан мэдээлснээр, Nvidia-гийн гүйцэтгэх захирал асан Женсен Хуантай харилцаатай байсан Хуан Лэ болон түүнтэй холбоотой компаниуд DeepSeek-тэй нягт холбоотой байжээ. Тэд АНУ-аас 2022 оны сүүлээс хэрэгжүүлж буй экспортын хяналтыг тойрч тус компанид Nvidia-гийн хамгийн дэвшилтэт Blackwell чипийг тогтмол нийлүүлж байсан гэнэ.

АНУ хиймэл оюун ухааны салбарт Хятадаас 6-12 сараар түрүүлж байгаа бөгөөд загваруудын чадвар хагас жилийн дотор эрс өөрчлөгдөж болзошгүй гэж Бессент мөн хэлсэн байна.