Францын эрх баригчид: Тав дахь бямба гарагийн жагсаалд улс даяар 106 мянган хүн оролцов

Францын Дотоод хэргийн яам арваннэгдүгээр сарын 14-нд болсон эсэргүүцлийн тав дахь бямба гарагийн жагсаалын дүнг зарлалаа. Жагсагчид амьжиргааны өртөг өсөхийн эсрэг, цагдаагийн хүчирхийллийн эсрэг, боловсролын тогтолцооны нөхцөлийг сайжруулахыг шаардсан уриан дор гарчээ. Яамны мэдээллээр, улс даяар 106 мянган хүн, тэр дундаа Парист 24 мянган хүн оролцжээ.

Харин залуучуудын үйлдвэрчний эвлэлүүдийн тооцоогоор Францад 200 мянган хүн жагсаалд оролцсоноос ойролцоогоор 100 мянга нь Парист байжээ.

Өнгөрсөн бямба гарагт буюу арваннэгдүгээр сарын 7-нд эрх баригчид улс даяар 146 мянга, Парист 46 мянган оролцогч тоолсон байна. Тэр үед үйлдвэрчний эвлэлүүд улс даяар 250 мянга, Францын нийслэлд 75 мянган хүн оролцсон гэж мэдэгдэж байв.

Парист жагсаалын үндсэн цуваа замынхаа эцсийн цэг болох Насьон талбайд “томоохон хэрэг явдалгүйгээр” хүрсэн гэж цагдаагийн префектур мэдэгдэв. Гэвч жагсаал дуусах үед залуучуудын бүлгүүд цагдаа нартай мөргөлдөв. Цагдаа нар олныг тараахын тулд нулимс асгаруулагч хий хэрэглэсэн бөгөөд хариуд нь цагдаа нар руу янз бүрийн зүйл шидэж байв.

Францын бусад хотод ч жагсагчид, цагдаа нарын хооронд зарим мөргөлдөөн гарчээ. Лион хотод BFMTV телевизийн зураг авалтын баг халдлагад өртсөн байна. Бордо, Тулуз, Нант хотуудад нөхцөл байдал хурцадмал байв.

Дотоод хэргийн яамны урьдчилсан мэдээллээр, жагсаал дуусах хүртэл Францад нийгмийн хэв журам зөрчсөн 121 хүнийг, тэр дундаа Парист 22 хүнийг саатуулжээ. Энэ тоог цаашид нарийвчлах юм байна.

Өмнө нь Дотоод хэргийн сайд Лоран Нуньес 70 мянган цагдаа, жандарм бямба гарагт улс даяар хэв журам сахиулна гэж зарласан юм.

Зүүний үзэлтэй Хөдөлмөрийн ерөнхий холбоо бол Францын хамгийн том үйлдвэрчний эвлэлийн нэгдлүүдийн нэг юм. Тус холбоо ирэх мягмар гарагт буюу арваннэгдүгээр сарын 17-нд улсын хэмжээний шинэ ажил хаялт, эсэргүүцлийн жагсаал хийхийг уриалсныг Францын хэвлэлүүд мэдээлж байна.