Францын Сенат эмх замбараагүй байдал үүсгэгчдээр хохирлыг төлүүлэх хуулийн төслийг дэмжив

Францын Сенат лхагва гарагт олон нийтийн эмх замбараагүй байдлын үеэр учруулсан хохирлын төлөө үймээн дэгдээгчдийг санхүүгийн хариуцлага хүлээлгэх, 10 мянган евро хүртэл торгох, нийгмийн халамжийн тэтгэмжийг нь хураах боломжтой хуулийн төслийг баталжээ. Энэ тухай Франс Твенти Фор телевиз мэдээлэв.

Хуулийн төслийг 5 дугаар сард Аваргуудын лигийн финалд Пари Сен-Жермен Арсеналыг ялсны дараа гарсан үймээний хариуд боловсруулсан юм. Харин тэгш бус байдал, үнийн өсөлтийг эсэргүүцсэн олон долоо хоногийн жагсаал 10 дугаар сарын 17-нд улс даяар мянга мянган бизнесийг сүйтгэж, дээрэмдсэн сүүлийн жилүүдийн хамгийн ширүүн хүчирхийлэлд хүрсний дараа энэ төсөл улам ач холбогдолтой болжээ.

Сенат хуулийн төслийн өргөтгөсөн хувилбарыг олонхтой баруун, төвийн эвслийн дэмжлэгтэйгээр 229 санал 105 саналаар баталсан бөгөөд одоо улс төрийн хүчнүүдэд хуваагдсан Үндэсний ассамблей хэлэлцэх юм.

Дотоод хэргийн сайд Лоран Нуньес 10 дугаар сарын 17-нд гарсан хохирол, эмх замбараагүй байдлын хариуд яаралтай арга хэмжээ авах шаардлагатайг онцолжээ. «Цөөн тооны эвдэн сүйтгэгчийн төлөө иргэдийнхээ дийлэнх олонхыг төлүүлэхийг бид цаашид зөвшөөрөх боломжгүй» гэж тэрбээр хэлэв.

Хуулийн төслөөр жагсагчид олон нийтийн цуглааны үеэр учруулсан хохирлын төлөө 10 мянган евро хүртэл төлөх үүрэг хүлээж болох юм. Мөн эвдэн сүйтгэх зорилгоор бүрдсэн бүлэгт «мэдсээр байж оролцсон» эсвэл цагдаа хоёр удаа тарахыг анхааруулсны дараа ч цуглаанд «сайн дураараа» үргэлжлүүлэн оролцсон хүмүүст хамтын санхүүгийн хариуцлага хүлээлгэхээр заажээ.

Шүүмжлэгчдийн үзэж буйгаар, эвдэн сүйтгэхэд оролцоогүй хүмүүс хариуцлагатай этгээдүүдтэй холбоотой гэж үзэгдвэл хариуцлага хүлээж болзошгүй юм. Хохирлыг нөхөхөд нийгмийн халамжийн тэтгэмж, орон сууцны тусламжийг хураах заалт зүүний намууд болон өмгөөллийн бүлгүүдийн хурц шүүмжлэлд өртөж, зүүний хууль тогтоогчид засгийн газрыг жагсаал цуглааны эрх чөлөөний хохиролд «авторитар хандлага руу гулсаж байна» гэж буруутгажээ.

Эмнести Интернэшнл байгууллага ч засгийн газрыг уг хуулийн төслөөс татгалзахыг уриалж, энэ нь аль хэдийн гадуурхагдсан гэр бүлүүдийг улам ядууралд түлхэж болзошгүйг анхааруулжээ.

Сенат мягмар гарагийн орой мөн «төрийн эсрэг бослого гаргах эсвэл зэвсэг барихыг» уриалсан нийгмийн сүлжээний контентыг яаралтай устгахыг шаардах бүрэн эрхийг эрх баригчдад олгох хуулийн төслийг баталсан бөгөөд платформууд ийм контентыг 24 цагийн дотор устгах ёстой.