Францын засгийн газар жагсаалын үеэр сошиал сүлжээ, гар утасны интернэтийг хаах асуудлыг судалжээ

Францын засгийн газар өнгөрсөн бямба гарагийн жагсаалын үеэр сошиал сүлжээг хаах арга замыг судалж байсныг төлөвлөгөөг мэдэх хоёр хүн Политико сайтад ярьжээ. Ерөнхий сайдын ажлын албаны нэгэн албан тушаалтан болон харилцаа холбооны компанийн нэгэн ажилтны хэлснээр, 10 дугаар сарын 24-ний өмнөх долоо хоногт Францын Дотоод хэргийн яам харилцаа холбооны операторуудтай холбогдож, үймээн самуун дэгдээгчид хоорондоо зохицохоос сэргийлэхийн тулд тодорхой бүсэд сошиал сүлжээ, тэр байтугай гар утасны интернэтийг хаах арга замыг судалжээ.

Энэ оролдлого Ерөнхий сайд Себастьен Лекорню Францын харилцаа холбооны операторуудаас ТикТок, Инстаграм, Снэпчат, Икс сүлжээг хаахад бэлэн байхыг шууд хүссэнээр оргилсон бөгөөд энэ захидлыг засгийн газрын хүсэлтийг анх мэдээлсэн Францын Бласт цахим хэвлэл ил болгожээ. Политико сайт холбогдоход Лекорнюгийн ажлын алба, Технологийн яам, Дотоод хэргийн яамны албаны хүмүүс энэ алхам болон захидал байгааг үгүйсгээгүй байна.

Засгийн газар 10 дугаар сарын 17-нд гарсан хүчирхийлэл дараагийн амралтын өдрүүдэд давтагдах эсвэл хурцдахаас болгоомжилж байсан ч 10 дугаар сарын 24-нд хамаагүй цөөн хэрэг бүртгэгдсэн тул энэ айдас биелээгүй. «Тэдний хамгийн түрүүнд хүссэн зүйл бол бүлэглэлүүдийн уулзаж, зохион байгуулалтад ордог холбооны сувгийг хаах явдал байсан» гэж нэрээ нууцлахыг хүссэн харилцаа холбооны компанийн ажилтан хэлэв.

Гэвч энэ алхам тайван жагсагчдын харилцаа холбоог ч тасалдуулах байсан. Тодорхой хороолол зэрэг бүсэд сошиал сүлжээг сонгон хаах нь техникийн хувьд боломжгүй бол гар утасны интернэтийг таслах нь гар утасны төлбөр, хамгаалалтын хяналтын төхөөрөмж, онцгой байдлын холбоо зэрэг бусад чухал үйлчилгээг ноцтой тасалдуулна. Ерөнхий сайдын ажлын албаны албан тушаалтны хэлснээр, засгийн газар танихгүй хүмүүсийн цугларалтаас сэргийлэхийн тулд байршил харуулах функцийг идэвхгүй болгох зөөлөн шийдлийг ч авч үзжээ.

Сошиал сүлжээнд хандахыг хязгаарлах бусад арга хэмжээг парламент эвдсэн нь төлнө гэх хуулийн төслийн хэлэлцүүлгийн хүрээнд ярилцаж байна. Энэ төсөл үймээнд санаатайгаар оролцсон хүмүүсийг эд хөрөнгө эвдсэн эсэхээс үл хамааран санхүүгийн хариуцлага хүлээлгэнэ. Мөн платформуудад нийтийн хэв журмыг ноцтой алдагдуулж болох бие махбодын болон бэлгийн халдлага, хулгай, сүйтгэлд уриалсан агуулгыг 24 цагийн дотор, бослогод уриалсан агуулгыг нэг цагийн дотор устгахыг үүрэг болгоно.

Бусад хууль тогтоогчид үймээн дэгдээгчдийг алгоритмт видео хяналтаар мөрдөхөөс эхлээд хулгайлагдсан бараа зарахаас сэргийлж чадаагүй онлайн зах зээлийг шийтгэх хүртэл арга хэмжээ санал болгож байна.