Фүжи ууланд энэ улирлын анхны цас оржээ

Японы бэлгэ тэмдэг болсон Фүжи уулын оройд энэ улирлын анхны цас баасан гарагт орсныг Японы цаг уурын агентлаг мэдэгджээ. Энэ тухай Киодо агентлаг мэдээлэв.

Агентлаг анх удаа нүдээр ажиглахын оронд радар болон бусад мэдээлэл ашиглан тогтоосон байна.

Анхны цас дунджаас 28 хоног, өнгөрсөн жилээс долоо хоног хоцорч орсон ч арга өөрчлөгдсөн тул шууд харьцуулахад хэцүү аж.

Яманаши мужийн орон нутгийн ажиглалтын төвийн албан тушаалтны хэлснээр, Химавари цаг уурын хиймэл дагуулыг ч ашигладаг шинэ арга нарийвчлалыг сайжруулж, ажлын ачааллыг бууруулах зорилготой. Өмнө нь Кофугийн ажиглалтын төвийн ажилтнууд уулын цасыг нүдээр шалгадаг байв.

Радарын мэдээгээр баасан гарагийн өглөөний 8 цагт уулан дээр дор хаяж 1 сантиметр цас тогтсон бөгөөд 3,776 метр өндөр оргилд агаарын хэм хасах 6.3 градус байжээ.

Шизуока, Яманаши мужийн заагт уулын бэлд орших Фүжиёшида хот ажилтнууд нь нүдээр баталгаажуулсны дараа анхны цасыг мөн өдөр тусад нь зарласан.

Уулаас ойролцоогоор 40 километрийн зайд орших Кофугийн ажиглалтын төв бороо, манангийн улмаас анхны цасыг тогтоож чадахгүй тохиолдолд зориулж тус хот 2006 оноос хойш ийм мэдэгдэл гаргаж ирсэн юм.