Япон гадаадын жуулчдын татваргүй худалдааг «одоо төлж, дараа нь буцааж авах» журамд шилжүүлнэ

Японы татваргүй худалдааны шинэ журмаар арваннэгдүгээр сарын 1-нээс эхлэн гадаадын зочид худалдан авалт хийхдээ хэрэглээний татвараа төлж, гаалиар гарах үедээ эсвэл тус улсаас гарсны дараа буцаан авах болно. Энэ тухай Ниппон.ком мэдээлэв.

2026 оны аравдугаар сарын сүүлээр дуусгавар болох одоогийн журмаар Японд зургаан сар хүртэл хугацаагаар байрлах гадаадын зочид татваргүй дэлгүүрээс хэрэглээний татвар төлөхгүйгээр бараа худалдан авч болдог байсан юм. Хэрэглээний татвар хүнс, согтууруулах ундаагүй ундаанд 8 хувь, бусад бараанд 10 хувь байдаг.

Шинэ журмаар худалдан авагчид татваргүй дэлгүүрт татвар орсон бүтэн үнийг төлж, явахдаа гаалийн бүрдүүлэлт хийн зээлийн карт эсвэл өөр төлбөрийн хэрэгслээр буцаан олголт авна. Ерөнхий болон хэрэглээний барааны ялгаа, зарцуулалтын дээд хязгаар байхгүй болох ч аялагчид зөвхөн биедээ авч гарах боломжтой бараагаар хязгаарлагдах юм.

Гадаадын жуулчдад зориулсан татваргүй худалдаа 1989 онд хэрэглээний татварыг нэвтрүүлэх үед эхэлжээ. Японы Аялал жуулчлалын агентлагийн статистикаар гадаадын зочид 2025 онд нийт 9.5 их наяд орчим иен зарцуулсан нь арван жилийн өмнөхөөс бараг гурав дахин их юм.

Сүүлийн жилүүдэд татваргүй худалдан авсан бараагаа Японд дахин худалдсан гэх тохиолдол нэмэгдэж байгаа аж. 2025 оны зургадугаар сард эрх баригч Либерал ардчилсан намын судалгааны бүлэг энэ тогтолцоог хянан үзэж, магадгүй халахыг санал болгожээ.

Тэдний тооцоогоор 2024 онд гадаадын жуулчдад олгосон хэрэглээний татварын хөнгөлөлт 200 тэрбум иенд хүрсэн байна.