Япон, Герман чухал ашигт малтмалын нийлүүлэлтийн сүлжээгээ бэхжүүлэхээр тохиролцов

Японы Ерөнхий сайд Санаэ Такаичи, Германы Канцлер Фридрих Мерц нар Хятадтай холбоотой эдийн засгийн аюулгүй байдлын нийтлэг санаа зовнилын үүднээс чухал ашигт малтмалын нийлүүлэлтийн сүлжээгээ бэхжүүлэхээр лхагва гарагт тохиролцжээ. Энэ тухай Кёдо агентлаг мэдээлэв.

Хоёр удирдагч дэлхийн аюулгүй байдлын орчин улам муудаж буйтай холбогдуулан хоёр орны батлан хамгаалах үйлдвэрлэлийн хамтын ажиллагааг дэмжихээ мэдэгдсэн гэж Такаичи хэлжээ. Мөн хиймэл оюун ухааны асуудлаарх өндөр түвшний яриа хэлэлцээний тогтолцоо байгуулж, цөмийн нийлэгжилт, устөрөгч зэрэг дэвшилтэт технологийн салбарт хувийн хэвшлийн хамтын ажиллагааг дэмжихээ баталжээ.

«Бид олон салбарт стратегийн хамтын ажиллагаагаа улам бэхжүүлэхээр тохиролцлоо» гэж Такаичи хэлжээ.

Германы удирдагч 2025 оны 5 дугаар сард албан тушаалд орсноос хойш Японд анх удаа айлчилж байгаа бөгөөд хэлэлцээний дараа гурван хамтарсан мэдэгдэл гаргахаар төлөвлөжээ.

Хятад экспортын хязгаарлалтаа чангатгаж байгаа тул Токио газрын ховор элемент зэрэг чухал ашигт малтмалын чиглэлээр бусад оронтой хамтын ажиллагаагаа нэмэгдүүлэхийг эрмэлзэж байна. Цахилгаан автомашин, хагас дамжуулагчаас эхлээд батлан хамгаалахын тоног төхөөрөмж хүртэл өндөр технологийн бүтээгдэхүүн үйлдвэрлэхэд шаардлагатай газрын ховор элементийн дэлхийн нийлүүлэлтэд Хятад давамгайлдаг.

Дэлхийн дөрөв, гуравдугаарт орох эдийн засагтай Япон, Герман хоёр газрын ховор элементийн нийлүүлэлтээр Хятадаас хараат байдлаа бууруулах сонирхолтой. Герман мөн Япон, Их Британи, Италийн 2035 он гэхэд дараагийн үеийн сөнөөгч онгоц бүтээх гурван талт хөтөлбөрт оролцож болзошгүй орон болж байгаа юм.