Германы 30 гаруй хотод залуучуудын жагсаал болжээ

Германы 30 гаруй хотод залуучуудын жагсаал болж, нэг зуун жаран мянга гаруй хүн оролцжээ гэж Ведомости сонин Бильд сониныг иш татан мэдээлэв.

Жагсаалыг Ген Зи регельт хөдөлгөөн зохион байгуулсан бөгөөд залуучууд боловсролын салбарыг сайжруулах, орон сууцыг хүртээмжтэй болгох, байгаль орчныг хамгаалах, зэвсэглэлийн уралдааныг багасгаж, нийгмийн үйлчилгээг танахаа зогсоохыг шаарджээ.

Эрфурт хотод 1900 орчим хүн жагсаж, Штутгартад 3000, Гамбургт 2000 гаруй хүн цугларсан байна.

Сонины мэдээлснээр, жагсаал өдөр тайван эхэлсэн ч орой болох тусам баривчилгаа, жагсагчдын дургүйцлийн тухай мэдээлэл гарч эхэлжээ. Ганноверт залуучууд «Мерц явах ёстой» гэж хашгиран засгийн газрыг эсэргүүцсэн бол Гамбургт жагсагчид салют буудаж, цагдаа хоёр эрэгтэйг баривчилсны нэг нь галт зэвсгийн дуурайлгал барьж байжээ.

Штутгартад цагдаа маск зүүсэн хүмүүсийн улмаас жагсаалыг зогсоожээ. Францын жагсаалын үеэр гарсантай адил эвдрэл сүйтгэлээс болгоомжилсон олон дэлгүүр цонхоо хаасан байна.

Намар Европын хэд хэдэн оронд жагсаал өрнөсөн юм. Францад 9 дүгээр сарын 21-нд Иль-де-Франс бүсэд сургалтын нөхцөлийг сайжруулахыг шаардсан жагсаал эхэлж, 10 дугаар сарын 17-нд оргилдоо хүрсэн бөгөөд Дотоод хэргийн яамны мэдээллээр тэр өдөр 500 000 орчим хүн жагссан байна.

Италид 10 дугаар сарын 17–18-нд түлшний өндөр үнэ, нийгмийн зардлыг цэргийн зардлын төлөө танасан төсвийн бодлогыг эсэргүүцсэн жагсаал эхэлжээ.