Германы хоёр сөрөг хүчний нам Оросын хоккейн шигшээ багийг дэлхийн аварга шалгаруулах тэмцээнд оролцуулахыг уриалжээ

Германы парламент дахь Германы төлөөх хувилбар болон Зүүний нам Оросын хоккейн шигшээ багийг олон улсын тэмцээнд оролцуулах тухай Спортын арбитрын шүүхийн шийдвэрийг хүлээн зөвшөөрөх ёстой гэж мэдэгдсэнийг Медуза сайт мэдээлжээ. Ийм тэмцээний хамгийн томоохон нь болох дэлхийн аварга шалгаруулах тэмцээн энэ улиралд Германд болно.

“Бид үүнийг хэвийн байдалд эргэн орж буй хэрэг гэж үзэж байна. Мэдээж Оросын тамирчдад виз олгох ёстой” гэж Германы төлөөх хувилбар намын спортын бодлого хариуцсан төлөөлөгч Йорн Кёниг мэдэгджээ.

Зүүний намын спортын асуудал хариуцсан Кристиан Гёрке шүүхийн шийдвэрийг харамсалтай бодит байдал гэж нэрлэсэн ч түүнд нүдээ аньж болохгүй гэжээ. Тэрбээр Оросын тамирчид бусад спортод аль хэдийн эргэн оролцож эхэлснийг сануулжээ.

Спортын арбитрын шүүх 10 дугаар сарын сүүлээр Оросын шигшээ багийг туг, дуулалтай нь олон улсын тэмцээнд эргүүлэн оролцуулахыг шаардсан юм. Энэ шийдвэр Канад болон Европын олон оронд хүчтэй эсэргүүцэл төрүүлжээ. Ойрын тэмцээнүүдийг зохион байгуулах орнуудын эрх баригчид оросуудыг оруулахгүй байх арга хайж байгаа бол зарим шигшээ баг Оросын багтай тоглохгүй гэж сүрдүүлж байна.

Дэлхийн аварга шалгаруулах тэмцээн 5 дугаар сард Германд болно. Тус улсын засгийн газар Оросын оролцоог “спортын болон эдийн засгийн шалтгаанаар бодитоор боломжгүй” хэмээн илээр эсэргүүцэж байсан. Тэмцээнийг зохион байгуулахаас Герман бүр татгалзаж магадгүй гэж засгийн газар үзэж байжээ.

Германы төлөөх хувилбар болон Зүүний нам Германы парламентад сөрөг хүчинд байгаа бөгөөд нийт 630 суудлаас 214-ийг эзэлдэг.