Йеменд дүрвэсэн гэр бүлүүд Аден дахь хуаранд хүнд нөхцөлд амьдарч байна

Африканьюс сайтын мэдээлснээр, хуситуудын 9 дүгээр сард эхлүүлсэн томоохон довтолгооны улмаас Йемений Таиз, Лахж мужаас дүрвэсэн олон зуун гэр бүл Аден хотын хуаранд хүнд нөхцөлд амьдарч, хүмүүнлэгийн тусламж хэрэгцээтэй хэвээр байна. Аль-Бурайка дүүргийн Рас Имран бүсэд байрлах Аль-Фирдаус 1, Аль-Фирдаус 2 хуаранд дүрвэгсэд 850 орчим майханд амьдарч байна.

Олон гэр бүл аюулгүй байдал алдагдсаны улмаас гэр орноо орхин дүрвэсэн бөгөөд тохиромжтой орон байр, амин чухал хэрэгцээгээ хангахад бэрхшээлтэй хэвээр байна. Мөн дүүргийн Салах ад-Дин бүсэд Таиз, Лахжаас дүрвэсэн гэр бүлүүд тусламж авсан ч дүрвэгсдийн хүмүүнлэгийн хэрэгцээ их хэвээр байна.

Олон улсын шилжилт хөдөлгөөний байгууллага 2026 оны 1 дүгээр сарын 1-нээс 10 дугаар сарын 24 хүртэл дор хаяж нэг удаа нүүдэллэхэд хүрсэн 49388 өрхийг бүртгэжээ.

Хуситуудын босогчдын бүлэглэл нийслэл Сана зэрэг Йемений өргөн нутгийг засгийн газраас булаан авах зорилгоор томоохон довтолгоо эхлүүлсэн юм. Тулалдааны эхний өдрүүдэд дор хаяж 70 мянган хүн гэр орноо орхин дүрвэжээ. Цөөн хэсэг нь хөрш Жибути руу дүрвэсэн ч дийлэнх нь улсынхаа дотор дүрвэгч хэвээр байна. Хуситуудын эсрэг Йемений засгийн газрын цэргээс гадна Саудын Араб тулалдаж байна.