Йемений мөргөлдөөнийг шийдэх гол түлхүүр нь иж бүрэн үндэсний яриа хэлэлцээ гэж ОХУ-ын Гадаад хэргийн яам үзэж байна

Йемений мөргөлдөөнийг тус улсын бүх бүс нутаг, хүн амын бүх бүлэг, тэр дундаа «Ансар Аллах» хөдөлгөөн буюу хуситуудын ашиг сонирхлыг харгалзсан иж бүрэн үндэсний яриа хэлэлцээгээр шийдэж болно гэж Москва үзэж байгааг ОХУ-ын Гадаад хэргийн дэд сайд Александр Алимов мэдэгджээ. Энэ тухай Интерфакс агентлаг мэдээлэв.

ОХУ-ын Гадаад хэргийн яамны цахим хуудсанд мэдээлснээр, 10 дугаар сарын 27-нд Москвад Алимов НҮБ-ын Ерөнхий нарийн бичгийн даргын Йемен дэх тусгай элч Ханс Грюндбергтэй зөвлөлдсөн байна. Яамны мэдээнд дурдсанаар, Алимов Йемений мөргөлдөөнийг шийдэх цорын ганц найдвартай арга бол тус улсын бүх бүс нутаг, угсаатан, шашны бүлгийн ашиг сонирхлыг тэгш тусгасан иж бүрэн үндэсний яриа хэлэлцээ гэдгийг онцолжээ.

Алимов НҮБ-ын Йемений асуудлаарх зуучлалын хүчин чармайлтыг зарчмын хувьд дэмжиж буйгаа баталж, Йемений болон бүс нутгийн бүх гол оролцогчтой ОХУ ажлын харилцаатай байгааг харгалзан зохицуулалтад хамгийн идэвхтэй туслахад Москва бэлэн байгааг илэрхийлэв.

Талууд Йемен дэх одоогийн хурцадлыг аль болох хурдан зогсоох, мөргөлдөөнийг хөрш орнуудын нутаг дэвсгэр, Улаан тэнгисийн усан хилд тархахаас сэргийлэх арга замыг хэлэлцэж, НҮБ-ын ивээл дор улс төр, дипломат үйл явцыг хуримтлагдсан ололтод тулгуурлан нэн даруй сэргээх нь чухал гэдэгт санал нэгджээ.