Тэрбумтан Дмитрий Алексеев баривчлагдсан улс төр судлаач Александр Кыневийг өмгөөлөн пост нийтлэв

Ди Эн Эс худалдааны сүлжээний ерөнхийлөгч, хамтран эзэмшигч Дмитрий Алексеев хар тамхи борлуулахыг завдсан хэргээр баривчлагдсан улс төр судлаач Александр Кыневийг өмгөөлсөн пост фэйсбүүкт нийтэлжээ. Энэ тухай Медуза хэвлэл мэдээлэв.

Алексеев постдоо Стругацкийн ахан дүүсийн зохиолоор саяхан гарсан цувралд ч номын хүмүүсийг хавчиж байгааг дундад зууны зэрлэг байдлын илрэл болгон харуулсан гэж бичжээ. Түүний хэлснээр, Кынев бол яг тийм номын хүн, одоо жорлонгийн оронд шалан дээр нүхтэй, хүн дүүрсэн камерт сууж буй шинжлэх ухааны хүн юм. «Эсвэл хүмүүнлэг гэдэг ч одоо хориотой үг болсон уу?» гэж Алексеев асуужээ.

Алексеевийн постыг анзаарсан Агентство хэвлэл энэ нь Оросын томоохон бизнесмен улс төрийн хэлмэгдүүлэлтийн хохирогч болсон хүнийг өмгөөлсөн ховор тохиолдол гэж онцолжээ.

Александр Кынев бол Оросын бүс нутгийн улс төрийн нэрт мэргэжилтэн юм. Түүнийг хар тамхины хэргээр 9 дүгээр сарын 25-нд баривчилсан бөгөөд баривчлах үеэр зодож, шилбэний ясыг нь хоёр газар хугалсан байна. 10 дугаар сарын 26-нд тэрбээр цагдан хорих төвд хоол идэхээс татгалзсан нь тодорхой болсон. Өмгөөлөгчийнх нь хэлснээр, Кыневтэй нэг камерт өөр 34 хүн сууж байгаа бөгөөд жорлон нь шалан дээрх нүх тул гипстэй хөлтэй Кынев ашиглаж чадахгүй байна.

Дмитрий Алексеевийн Ди Эн Эс бол Орост дижитал болон гэр ахуйн цахилгаан бараа борлуулдаг хамгийн том сүлжээний нэг юм. Форбс сэтгүүл Алексеевийн хөрөнгийг 1.6 тэрбум ам.доллар гэж үнэлдэг. Бизнесмен өмнө нь ч, тухайлбал Алексей Навальный цагдан хорих төвд нас барсны дараа эрх баригчдыг шүүмжилж байсан юм.