Их Британийн Сангийн сайд Хили анхны төсөвтөө эрчим хүчний зардлыг бууруулж, банкуудад татвар нэмэв

Их Британийн Сангийн сайд Жон Хили лхагва гарагт амьжиргааны өртгийн асуудлыг шийдвэрлэх зорилгоор эрчим хүчний зардлыг бууруулахыг оролдож, төсвийн нөөцөө багасгаж, банкуудад шинэ татвар ногдуулжээ. Энэ тухай Политико Юроп хэвлэл мэдээлэв.

Хили Ерөнхий сайд Энди Бёрнхэмийн удирдлага дор гаргасан засгийн газрын анхны төсвөөр өвлийн улиралд олон сая британичуудад 100 фунт стерлингийн эрчим хүчний тэтгэмж олгохоо амлаж, Ойрх Дорнод дахь дайнаас үүдэлтэй тодорхойгүй байдлыг үүний үндэслэл болгосон байна.

«Бид энэ дайныг хүсээгүй. Энэ бол Британийн гэр бүл, бизнесүүдийн зардлыг өсгөсөн дайн юм» гэж Хили хэлжээ.

Хилигийн хэлснээр, 20 сая орчим өрхөд эрчим хүчний тэтгэмжийг банкны дансанд нь шууд олгох бөгөөд хөтөлбөр 2.6 тэрбум фунт стерлингийн өртөгтэй. Дэлхийн байгалийн хийн үнэ өссөнөөс болж өрхийн жилийн эрчим хүчний төлбөр 1 дүгээр сард 450 орчим фунт стерлингээр нэмэгдэх төлөвтэй байна.

Орлогын талаас Хили банкуудын ашигт ногдуулдаг нэмэлт татварыг гурван нэгж хувиар нэмж, 6 хувьд хүргэх бөгөөд энэ нь 1 дүгээр сараас эхлэн 15 сар үргэлжилнэ. Уг татварыг 8 хувьд хүрч болзошгүй гэсэн өмнөх мэдээллээс зөөлрүүлсэн тул Ллойдс, Барклэйс зэрэг Британийн томоохон банкуудын хувьцааны үнэ эхэндээ өсчээ.

Төсвийн хариуцлагын газрын таамаглалаар, Хилигийн төсвийн нөөц 2029/30 санхүүгийн жил гэхэд 15 тэрбум фунт стерлинг болж буурах бол 3 дугаар сарын таамаглалд энэ нь 24 тэрбум фунт стерлинг байжээ. Энэ жилийн ДНБ-ий өсөлтийг 1.1 хувиас 1.2 хувь болгон дээшлүүлсэн ч 2027 оны өсөлтийг 1.6 хувиас 1 хувь болгон бууруулсан байна.

Сөрөг хүчний удирдагч Кеми Баденок Лейборист намыг улс орны асуудлыг шийдвэрлэж чадахгүй байна гэж буруутгажээ. «Бид хэт их зарцуулж, хэт их зээлж, хэт их татвар төлж, хяналтаас гарсан халамжийн тогтолцоонд живж байна» гэж тэрбээр Нийтийн танхимд хэлжээ.