Трамп АНУ-ын газрын тос, байгалийн хийн салбарын метаны ялгарлын дүрмийг сулруулав

АНУ-ын Ерөнхийлөгч Дональд Трамп мягмар гарагт газрын тос, байгалийн хийн үйлдвэрлэгчдийн метаны ялгарлын хязгаарлалтыг ихээхэн сулруулах төлөвлөгөөгөө зарлажээ. Энэ тухай Евроньюс телевиз мэдээлэв. Уг дүрмийг Ардчилсан намын хуучин Ерөнхийлөгч Жо Байдены засаг захиргааны үед нэвтрүүлсэн юм.

«Өнөө орой би хэрэглэгчид, эрчим хүч үйлдвэрлэгчдэд 45 тэрбум ам.доллар хэмнэхийн тулд Байдены үнэтэй, шаардлагагүй метаны дүрмийг албан ёсоор цуцалж байна» гэж Трамп Техас мужийн Лаббок хотод болсон цуглаан дээр хэлэв.

Трамп энэ алхам Техасын байгалийн хийн асар их нөөцийг нээнэ гэж хэлсэн бөгөөд Техас бол АНУ-ын чулуужсан түлш хамгийн их үйлдвэрлэдэг муж юм.

Байгаль орчныг хамгаалах агентлаг энэ сарын эхээр 45 тэрбум ам.доллар буюу ойролцоогоор 39 тэрбум еврогийн хэмнэлт гарна гэж тооцоолсон ч дэлгэрэнгүй задаргааг гаргаагүй байна. «Америкчууд өвөлдөө байшингаа халааж, машиндаа түлш хийж ажилдаа явах боломжтой байх ёстой» гэж агентлагийн дарга Ли Зелдин хэлжээ.

Байгалийн хийн гол бүрэлдэхүүн хэсэг болох метан нь нүүрсхүчлийн хийн дараа дэлхийн дулаарлын хоёр дахь том хүчин зүйл бөгөөд дэлхийн дулаарлын гуравны нэг орчмыг үүсгэдэг.