Иран АНУ-ын баазуудыг онилохдоо цэргүүдийн олон нийтийн сүлжээ, фитнес аппын мэдээллийг ашиглажээ

Иран Ойрх Дорнод дахь Америкийн баазууд руу цохилт өгөхөөр бэлтгэхдээ АНУ-ын цэргийн албан хаагчид өөрсдөө ил болгосон мэдээлэлд тулгуурласан гэж аюулгүй байдлын шинжээчид төдийгүй АНУ-ын арми өөрөө ч үзэж байна. Иран олон нийтийн сүлжээний хаяг, фитнес апп, тэр ч байтугай зар сурталчилгаанаас мэдээлэл цуглуулж, бүс нутаг дахь АНУ-ын баазуудын өдөр тутмын хэвшлийг тодорхойлжээ.

Энэ мэдээллийг Оросын өгсөн гэх хиймэл дагуулын зурагтай хослуулан ашигласнаар Ираны бай тогтоогчид АНУ-ын цэргүүд хаана цуглардаг, хаана цохих ёстойг гайхмаар нарийвчлалтай тогтоосон байна. Олон дрон, пуужинг саатуулсан ч зарим нь бай оносноор арван хоёроос олон цэргийн албан хаагч амь үрэгдэж, олон зуун хүн шархдаж, байгууламж, техник хэрэгсэлд олон тэрбум долларын хохирол учирсан аж.

Сүүлийн саруудад Конгрессын шахалтаар зэвсэгт хүчний хэд хэдэн төрөл албаны гар утсан дээрх зар сурталчилгааны таних дугаарыг идэвхгүй болгожээ. Тэнгисийн цэргийн хүчин ч далайчдад олон нийтийн сүлжээний идэвхээ хязгаарлаж, хувийн төхөөрөмж дээрх байршлын мэдээллийг унтраахыг зөвлөжээ.

Аюулгүй харилцаа холбооны Veilant компанийн гүйцэтгэх захирал Эрик Виттрейх албаны төхөөрөмж дээрх мэдээллийг хязгаарлах нь сайн эхлэл гэв. Гэхдээ үүнийг халдлагын дараа хийдэг аюулгүй байдлын засвар бус, “хүчний хамгаалалтын томоохон үүрэг” гэж үзэх ёстой гэжээ. “Одоо системийг хакердах шаардлагагүй. Мэдээллийг худалдаж авч болно” гэж тэрбээр хэлэв.

Британийн Sky News телевиз наймдугаар сард хийсэн шалгалтаараа Strava фитнес аппын 1300 гаруй хэрэглэгч дасгалын маршрут, цагаа нийтэд ил болгож байгааг илрүүлжээ. Пентагон Strava-г аюулгүй байдлын болзошгүй эрсдэл гэж анхааруулснаас хойш долоон жил гаруй өнгөрчээ. Шинжээчдийн хэлснээр, ихэнх нь онлайн мэдээллийн брокеруудаар зарагддаг ийм мэдээллээр баазын ээлж солих, хоолны цаг зэрэг хэмнэлийг тодорхойлох боломжтой.

Асуудал нэг талаар АНУ-ын арми Ойрх Дорнод дахь зарим баазаа олон арван жил ажиллуулахдаа дайсан ноцтой халдлага хийж чадахгүй, эсвэл хийхгүй гэж итгэж ирсэнтэй холбоотой. Жишээ нь Тэнгисийн цэргийн хүчин 1995 оноос хойш логистикийн гол төвөө ажиллуулж ирсэн Бахрейны баазад 9000 орчим хүн тайван алба хааж байжээ. Google Maps дээр баазын боулингийн танхим, сагсан бөмбөгийн талбай, гал тогоо, биеийн тамирын заалыг хүртэл тэмдэглэж, сэтгэгдэл бичсэн байдаг.

Иран дайны эхний зургаан сард АНУ-ын цэргийн 26 байгууламж болон АНУ-ын албан хаагчдыг нүүлгэн байрлуулсан зочид буудал руу цохилт өгсөн бөгөөд ийм мэдээлэл түүнд хэрэг болсон байх магадлалтай. АНУ болон холбоотнууд нь Ираны халдлагын 90 гаруй хувийг саатуулсан ч цохилтууд нисэх зурвас, ангар, нисэх онгоц, дэвшилтэт радар, амьдрах байр зэрэг олон зуун байгууламжийг сүйтгэжээ.

Тоног төхөөрөмж, нисэх онгоцыг тооцохгүйгээр бүс нутгийн баазуудын эвдрэлийг засахад ойролцоогоор 9 тэрбум ам.доллар шаардлагатай гэж тооцоолж байна. Тэнгисийн цэргийн ажиллагааны дарга адмирал Дэрил Каудл наймдугаар сард Бахрейны баазын эвдрэл их тул “бид удахгүй тийшээ буцахгүй” гэж хэлжээ.

Хөлөг онгоцууд одоо 2000 гаруй милийн зайд орших, Энэтхэгийн далай дахь Диего Гарсиа арал дээр хангамжаа нөхөх болсон нь Тэнгисийн цэргийн хүчний логистикийг улам хүндрүүлж, зардлыг нэмэгдүүлжээ. “Гэр бүлээрээ тийшээ очдог үе дууссан нь гарцаагүй” гэж тэтгэвэрт гарсан тэнгисийн цэргийн ахмад Жон Кордл хэлэв.