Иранаар дэмжүүлдэг Хуситууд Саудын Арабын Aramco компанийн байгууламжид халдсанаа мэдэгдэв

Иранаар дэмжүүлдэг Йемений Хусит хөдөлгөөн пүрэв гарагт (11 дүгээр сарын 12) Саудын Арабын нийслэл Эр-Рияд дахь Саудын Aramco компанийн нэгэн байгууламж руу нисгэгчгүй онгоцоор халдсан гэж мэдэгдлээ. Энэ мэдэгдлийг одоогоор бие даан баталгаажуулаагүй байна. Ийм төрлийн халдлага 9 дүгээр сараас хойш дөрөв дэх удаагаа гарч байна.

Хуситуудын цэргийн хэвлэлийн төлөөлөгч Яхья Сари X сүлжээнд нийтэлсэн бичлэгтээ Саудын Aramco-гийн байгууламж руу хийсэн халдлага амжилттай болсон гэжээ. Тус террорист бүлэглэл мөн хоёр халдлага үйлдсэн гэж Сари пүрэв гарагт мэдэгдсэн бөгөөд нэг нь “Зүүн-Баруун нефть дамжуулах хоолой” дээрх шахуургын станцад нисгэгчгүй онгоцоор, нөгөө нь Янбу дахь газрын тосны байгууламжид баллистик пуужингаар хийсэн халдлага байжээ.

Саудын Араб Хуситуудын мэдэгдсэн шинэ халдлагын талаар одоогоор тайлбар өгөөгүй ч Йемений засгийн газрыг дэмждэг, Саудын Араб тэргүүтэй цэргийн эвсэл пүрэв гарагийн орой Хуситуудын хөөргөсөн хоёр нисгэгчгүй онгоцыг Эр-Рияд болон зүүн бүсэд саатуулж устгасан гэж мэдээлжээ.

Хэрэв батлагдвал “Зүүн-Баруун нефть дамжуулах хоолой” энэ долоо хоногт хоёр дахь удаагаа халдлагын бай болсон хэрэг болно. Уг хоолойгоор Персийн булангийн бүс нутгийн зүүн хэсгийн нефтийн ордуудаас Улаан тэнгисийн Янбу боомт хүртэл газрын тос тээвэрлэдэг.

Саудын Араб Ормузын хоолойгоор дамжих тээвэр тасалдаж, далайн тээвэрт халдлага үйлдэж буйг тойрч, газрын тосоо дэлхийн зах зээлд экспортлохдоо “Зүүн-Баруун нефть дамжуулах хоолой”-д найдсаар ирсэн.

Хуситууд пүрэв гарагт мөн өөр хоёр халдлага үйлдсэн гэж мэдэгджээ. Нэг нь Йемений хилийн ойролцоох Хамис-Мушайт агаарын цэргийн бааз руу баллистик пуужингаар, нөгөө нь Саудын Арабын Нажран мужийн Шаруры нисэх онгоцны буудал дахь цэргийн тээврийн онгоц руу нисгэгчгүй онгоцоор хийсэн халдлага юм.

Саудын Араб Европын холбоог АНУ-ын жишгээр Хуситуудыг террорист байгууллагаар зарлахыг уриалж байна гэж Рейтер агентлаг Европын зургаан албан тушаалтныг иш татан пүрэв гарагт мэдээлэв.

Эр-Рияд нь Хуситуудын халдлагын эсрэг олон улсад хүлээн зөвшөөрөгдсөн Йемений засгийн газрыг дэмжиж ирсэн есөн орны эвслийг удирдаж байна.

Хуситуудын Йемен дэх давшилт Йемен, Саудын Араб болон далайн тээвэрт аюул учруулж байна гэж АНУ болон НҮБ мэдэгдсэн.