Ираны дайны үеэр түүхий тосгүй болсон Петровьетнам шингэрүүлсэн хий, салхи, цөмийн эрчим хүчинд найдаж байна

Иран 3 дугаар сард Ормузын хоолойг хаасны дараа Вьетнамын төрийн өмчит газрын тос, байгалийн хийн Петровьетнам компани Ойрхи Дорнодын түүхий тосгүй болсон тухай Форчун сэтгүүл мэдээлжээ.

«Манай хоёр боловсруулах үйлдвэрийн нэг нь Ойрхи Дорнодын түүхий тосонд 100 хувь найддаг бөгөөд хэсэг хугацаанд Ойрхи Дорнодоос нэг ч дусал тос аваагүй» гэж компанийн ерөнхийлөгч Ле Мань Кыонг 11 дүгээр сарын 3-нд Хо Ши Мин хотод болсон чуулга уулзалтад хэлжээ.

1975 онд байгуулагдсан Петровьетнам Малайз, Индонез, Монгол зэрэг оронд геологи хайгуул хийдэг бөгөөд 2025 онд хорин дөрвөн тэрбум долларын орлоготойгоор Зүүн Өмнөд Азийн томоохон компаниудын жагсаалтад 11-д бичигджээ.

Вьетнамын эдийн засаг 2025 онд 8.02 хувиар өсч, өндөр технологийн үйлдвэрлэл, экспорт, дэд бүтцийн хөрөнгө оруулалт эрчим хүчний эрэлтийг нэмэгдүүлж байна.

Ле дунд хугацаанд шингэрүүлсэн байгалийн хийд анхаарч, компани нийт 1600 мегаватт хүчин чадалтай тус улсын анхны хоёр хийн цахилгаан станцыг ажиллуулж байна. Урт хугацаанд далайн салхи болон цөмийн эрчим хүч рүү чиглэж байгаа аж.

Компани 10 дугаар сард Данийн Копенгаген Инфраструктур Партнерс компанитай дөрвөн тэрбум долларын түншлэлийн гэрээ байгуулж, далайн салхин цахилгаан станцын төслийг урагшлуулахаар болжээ.

Вьетнам 3 дугаар сард Оросын Росатомтой атомын цахилгаан станц барих гэрээ байгуулсан бөгөөд Петровьетнамд Кханьхоа мужид тусдаа станц барих үүрэг өгсөн юм.