Испанийн парламент олон нийтийн эсэргүүцэл дагуулсан орон сууцны тогтоолыг нэг саналын зөрүүгээр баталлаа

Испанийн парламент түрээсийн төлбөрийг хязгаарлаж, түрээслэгчдийг нүүлгэхийг түр хориглосон тогтоолыг нэг саналын зөрүүгээр баталлаа. Харин түрээсийн гэрээг автоматаар сунгах тухай тогтоолыг мөн нэг саналын зөрүүгээр унагажээ.

Сарын өмнө парламент эдгээр хоёр тогтоолыг батлахаас татгалзсанаас болж улс даяар эсэргүүцлийн жагсаал өрнөж, улс төрийн хямрал үүсэн, парламентын ээлжит бус сонгууль зарлах болсон юм.

Өмнөх өдөр буюу арваннэгдүгээр сарын 11-нд Испанид 14 жилийн дараа анх удаа улс даяар ажил хаялт болов. Тус улсын хамгийн том хоёр үйлдвэрчний эвлэл болох UGT, CCOO болон түрээслэгчдийн холбооноос зохион байгуулсан эсэргүүцлийн арга хэмжээнд дөрвөн сая орчим хүн оролцжээ.

Жагсагчид түрээсийн төлбөрийг огцом өсгөсөн орон сууцны хямралыг эсэргүүцэв. Хямралд хамгийн ихээр өртсөн Андалуси, Каталонид эсэргүүцлийн арга хэмжээнд хамгийн олон хүн оролцжээ.

Барселон хот руу орох гол замуудыг хаасан байна. Эсэргүүцлийн арга хэмжээ ерөнхийдөө тайван өнгөрсөн ч арваннэгдүгээр сарын 11-ний орой нүүрээ малгайгаар халхалсан зарим бүлэг жагсагчид дэлгүүр эвдэж, хогийн сав шатаахыг оролдсон байна.

Улс даяар ажил хаялт болсон өдөр жижиг зөрчил гаргасан 50 орчим хүнийг саатуулсан гэж хууль сахиулах байгууллага мэдэгдэв. The Guardian-ий тэмдэглэснээр, төлөвлөсөн арга хэмжээнүүд бүгд болоогүй бөгөөд тус улсын зарим хэсэгт цаг агаар муу байсан тул жагсаалыг цуцалжээ.