Камбож дахь ажлын луйврыг мэдсээр байж Өмнөд Солонгосын яам арга хэмжээ аваагүй гэж аудит дүгнэжээ

Өмнөд Солонгосын Гадаад хэргийн яам Камбожид солонгосчуудыг онилсон ажлын луйвар хурцдаж байгааг мэдсээр байж аялалын сэрэмжлүүлгээ цаг тухайд нь дээшлүүлээгүй гэж Аудитын газар мэдэгдсэн тухай Кореа Таймс сонин мэдээлэв.

Яам 2023 оны 12 дугаар сараас хойш гадаад дахь төлөөлөгчийн газар, хувийн компаниудаас авсан мэдээллээр солонгосчууд ажлын луйвар, хүн хулгайн хэрэгт өртөж байгааг мэдсэн аж.

Камбож дахь Элчин сайдын яам 2024 оны 4, 7 дугаар сард сэрэмжлүүлгийг дээшлүүлэхийг санал болгосон ч яам шалгуурт хүрэхгүй гэх мэт шалтгаанаар татгалзжээ.

Хэвлэл мэдээлэл 8 дугаар сард эдгээр хэргийг мэдээлсний дараа яам сэрэмжлүүлгээ дээшлүүлэх алхам хийж, оюутны үхэл ил болсны дараа буюу 9 дүгээр сард эцэслэн дээшлүүлжээ.

Өнгөрсөн жил Хятадын луйврын бүлэглэл Камбожид Өмнөд Солонгосын коллежийн оюутныг эрүүдэн шүүж алсан нь олны уур хилэнг төрүүлсэн юм. Өндөр цалинтай ажил амлаж залуусыг тус улсад хууран авчирч хулгайлсан төстэй хэргүүд ч ил болсон байна.

Яам гадаад дахь иргэдээ хамгаалах ажлын хэсгийг идэвхжүүлэх ёстой байсан ч энэ талаар хурал ч хийгээгүй гэж Аудитын газар дүгнэжээ. Аудитын байгууллага яамны гурван албан тушаалтанд сахилгын арга хэмжээ авахыг зөвлөсөн.