Камерун хоёр удаа хойшлуулсан парламент, орон нутгийн сонгуулиа 2 дугаар сарын 7-нд явуулна
Пол Бийя дахин сонгогдсоны дараа эрх баригчид сөрөг хүчнийг хавчиж байгаа хурцадмал үед уг шийдвэр гарчээ.
Камеруны Ерөнхийлөгч Пол Бийя парламент болон орон нутгийн сонгуулийг ирэх оны 2 дугаар сарын 7-нд явуулахаар зарласныг Аль Жазира телевиз мэдээлжээ.
Даваа гарагт төрийн радиогоор уншсан зарлигаар энэ шийдвэрийг мэдэгджээ. Бийя 1982 оноос хойш засаглаж буй, 93 нас хүрсэн дэлхийн хамгийн өндөр настай төрийн тэргүүн юм.
Өнгөрсөн оны 10 дугаар сард Бийя дахин сонгогдсон нь өргөн хүрээтэй эсэргүүцэл дагуулж, эрх баригчид хүчирхийллээр дарсан юм. Хүний эрхийн ажиглагч байгууллагын иш татсан хуульчдын хэлснээр аюулгүй байдлын хүчнийхэн 2000 хүртэлх хүнийг баривчилжээ.
Засгийн газар парламент, орон нутгийн сонгуулийг өмнө нь хоёр удаа хойшлуулж, хууль тогтоогчдын бүрэн эрхийг 12 дугаар сарын 20 хүртэл, орон нутгийн зөвлөлийн гишүүдийнхийг 2027 оны 2 дугаар сарын 28 хүртэл сунгажээ.
4 дүгээр сард үндсэн хуулийн шинэчлэлээр дэд ерөнхийлөгчийн албан тушаалыг сэргээсэн бөгөөд Бийя нас барвал түүнийг залгамжлах ёстой ч уг албан тушаалтныг хараахан томилоогүй байна.
Өнгөрсөн сард эрх баригчид ялагдсан сөрөг хүчний нэр дэвшигч Исса Чирома Бакаригийн намын үйл ажиллагааг түдгэлзүүлсэн юм. Бакари өөрийгөө сонгуулийн ялагч гэж зарласны дараа Гамби руу цөллөгт гарчээ.
