Канад АНУ-аас бусад зах зээлд гарах хүрээнд Арабын Нэгдсэн Эмират Улстай худалдааны хэлэлцээр байгуулав
Хэлэлцээр бүрэн хэрэгжсэний дараа Канадаас АНЭУ руу экспортолж буй бүтээгдэхүүний 99 гаруй хувийн тарифыг бууруулах эсвэл тэглэнэ. Хэлэлцээр 2027 онд хүчин төгөлдөр болох төлөвтэй.
Канад, Арабын Нэгдсэн Эмират Улс хоёр эдийн засгийн хоорондох саадыг бууруулж, хөрөнгө оруулалтыг нэмэгдүүлэх иж бүрэн худалдааны хэлэлцээр байгуулсныг хоёр улсын засгийн газар мэдэгджээ. Энэ тухай Аль Жазира телевиз мэдээлэв.
Канадын Ерөнхий сайд Марк Карни АНУ-тай хурцадмал байдал үүссэн энэ үед худалдаа, хөрөнгө оруулалтын харилцаагаа өргөжүүлэхийг эрмэлзэж байгаа юм. Карни болон Абу-Дабигийн угсаа залгамжлах хунтайж шейх Халид бин Мохаммед бин Зайед Аль Нахайян нар мягмар гарагт тарифыг бууруулах, хүнд суртлыг багасгах, хоёр орны бизнест зах зээлд нэвтрэх боломжийг сайжруулах зорилготой Эдийн засгийн иж бүрэн түншлэлийн хэлэлцээрийн гарын үсэг зурах ёслолыг тэргүүлжээ.
Трампын тариф Канадын эдийн засагт нөлөөлж эхэлснээр Карни ирэх арван жилд АНУ-аас бусад оронтой хийх худалдаагаа хоёр дахин нэмэгдүүлэхээ амласан. Вашингтонтой тохиролцоонд хүрэх оролдлогууд нурсан нь Карниг Ази-Номхон далай, Европ, Ойрх Дорнодын орнуудтай худалдааны гэрээ байгуулахыг идэвхтэй эрэлхийлэхэд хүргэсэн байна.
«Бүрэн хэрэгжсэний дараа хэлэлцээр Канадаас АНЭУ руу одоо экспортолж буй бүтээгдэхүүний 99 гаруй хувийн тарифыг бууруулах эсвэл бүрмөсөн арилгана» гэж Ерөнхий сайдын ажлын алба мэдэгдэв.
Мэдэгдэлд дурдсанаар, хэлэлцээр 2027 онд хүчин төгөлдөр болох төлөвтэй.
Хоёр улс мөн эрчим хүч, дипломат харилцаа, батлан хамгаалахын хамтын ажиллагааны урьдчилсан хэлэлцээрүүдэд гарын үсэг зурав. АНЭУ-ын Гадаад худалдааны сайд Тани бин Ахмед Аль Зейуди Канадын хамтрагч Маниндер Сидхутай хамт хэлэлцээрт гарын үсэг зурсан. Хоёр орны хувийн хэвшилд асар их боломж байна гэж Аль Зейуди онцолжээ.
АНЭУ бол Канадын экспортын Ойрх Дорнод дахь хамгийн том зах зээл юм. Засгийн газрын мэдээллээр, өнгөрсөн жил хоёр орны худалдаа 3.5 тэрбум канад доллар буюу 2.48 тэрбум ам.долларт хүрсэн бөгөөд сүүлийн хэдэн жилийн турш жил бүр 10 хувиар өсч байна. АНЭУ мөн өнгөрсөн жил Канадад 50 тэрбум ам.доллар хүртэлх хөрөнгө оруулахаа амласан юм.
