Мэргэжилтнүүд шийдвэр гаргахдаа хиймэл оюун ухаанд захирагддаг болохыг Антропик компанийн судалгаа харуулав
Шинжээчид хиймэл оюун ухааны туслахын илүүд үзсэн хувилбартай давхцах сонголтыг 86 хувьд нь хийсэн ч ердөө 15 хувь нь хиймэл оюун ухааныг бодлынхоо эх сурвалж гэж хүлээн зөвшөөрчээ.
Хиймэл оюун ухаан ашигладаг мэргэжилтнүүд шийдвэр гаргахдаа уг технологид дийлэнхдээ захирагддаг болохыг Клод загварыг бүтээгч Антропик компанийн судалгаа харуулжээ. Энэ тухай Аль Жазира телевиз мэдээлэв.
Мягмар гарагт нийтэлсэн судалгааны ажилдаа Антропик компани 50 мэргэжлийн шинжээчээс зохиомол хөдөө аж ахуйн хоршоонд зөвлөгөө өгөхийг хүсч, хиймэл оюун ухаан ашиглахдаа мэргэжилтнүүд шийдвэрээ өөрсдөө гаргадаг эсэхийг судалсан байна. Оролцогчид эцсийн бодлогын зөвлөмжөө гаргахаас өмнө үндэслэлтэй хоёр хувилбараас дөрвөн удаа сонголт хийх ёстой байв. Шинжээчдэд мэдэгдэлгүйгээр Антропик оролцогч бүрийн хиймэл оюун ухааны туслахыг тодорхой шийдвэр рүү чиглүүлж, шинжээчийн шийдвэрт нөлөөлж буй эсэхийг хэмжжээ.
Судалгаагаар шинжээчид хиймэл оюун ухааны туслахын илүүд үзсэн хувилбартай давхцах сонголтыг 86 хувьд нь хийсэн байна. Туслахтайгаа зөвлөлдөхөөс өмнө тодорхой байр суурьтай байсан оролцогчид туслах санал нийлэхгүй тохиолдолд шийдвэрээ 60 хувьд нь өөрчилжээ. Шийдвэрээ тайлбарлахыг хүсэхэд шинжээчдийн 77 хувь нь хиймэл оюун ухааны туслахын аргументыг ашигласан ч ердөө 15 хувь нь хиймэл оюун ухааныг бодлынхоо эх сурвалж гэж дурджээ.
Антропик судалгаа нь зөвхөн нэг даалгаварт хамаарч, санаатайгаар тодорхой байр суурьтай болгосон хиймэл оюун ухааны туслах ашигласан зэрэг хязгаарлалттай болохыг дурдсан. Судлаачид Амач Хердагделен, Хэйли Жорен, Алекс Тамкин нарын үзэж буйгаар, хүмүүсийн хиймэл оюун ухаанд захирагдах хандлагыг мэргэжилтнүүд өөрсдөө ч олж харахад хэцүү байж магадгүй бөгөөд энэ нь хиймэл оюун ухааны аюулгүй байдал зэрэг чухал бодлогын шийдвэрт нөлөөлж болзошгүй юм.
«Хиймэл оюун ухаанаар илүү олон ажил гүйцэтгэх тусам хүний дүгнэлт утга бүхий хяналт хэвээр үлдэх ёстой бол эдгээр шийдвэрийг хэрхэн гаргаж буйд хяналт тавих хэрэгтэй» гэж тэд бичжээ. 2 их наяд ам.доллар хүртэлх үнэлгээтэйгээр хувьцаагаа олон нийтэд санал болгохоор бэлтгэж буй Антропик болон түүний өрсөлдөгчид хиймэл оюун ухааны болзошгүй аюулыг хэрхэн удирдах тухай олон нийтийн ширүүн мэтгэлцээний төвд байгаа юм.
