Япон, АНУ-ын батлан хамгаалахын сайд нар Хятадын нөлөө өсч буй энэ үед сааруулах чадвараа бэхжүүлэхээр тохиролцов

Японы Батлан хамгаалахын сайд Шинжиро Коизуми, түүний АНУ дахь хамтрагч Пит Хегсет нар 10 дугаар сарын 28-нд Филиппинд уулзжээ. Тэд Хятадын цэргийн үйл ажиллагаа нэмэгдэж буй энэ үед хоёр орны аюулгүй байдлын холбоотны сааруулах чадварыг бэхжүүлэхийн тулд батлан хамгаалахын хөрөнгө оруулалтыг нэмэгдүүлж, стратегийн уялдаагаа үргэлжлүүлэх нь чухал гэдэгт санал нэгджээ. Энэ тухай Кёдо агентлагаас иш татан Стрэйтс Таймс сонин мэдээлэв.

АНУ-ын Батлан хамгаалах яамны мэдээлснээр, сайд нар Хятадын эргээс зүүн тийш орших, Япон, Тайвань, Филиппинийг багтаасан анхны арлын гинжид үр дүнтэй хориглон хамгаалалтыг хэрэгжүүлэх хүчин чармайлтын талаар тохиролцжээ.

Зүүн өмнөд Азийн орнуудын холбооны батлан хамгаалахын уулзалтуудад оролцохоор Себу хотод айлчилж буй Коизуми Японы аюулгүй байдлын стратеги болон холбогдох баримт бичгийг оны эцэс гэхэд шинэчлэх ажлын талаар Хегсетэд танилцуулсан. Хоёр сайд мөн 10 дугаар сарын эхээр Окинава мужид нэгэн эмэгтэйг дээрэмдэж, хөнөөсөн сэжигээр АНУ-ын тэнгисийн явган цэргийн нэг цэргийг баривчилсны дараа урьдчилан сэргийлэх арга хэмжээний талаар яриа хэлэлцээ үргэлжлүүлэхээ баталжээ.

Коизуми 10 дугаар сарын 29-нд болох уулзалтын өргөтгөсөн хуралдаанд оролцох бөгөөд тэнд Зүүн өмнөд Азийн орнуудын холбооны 11 гишүүн болон Австрали, Хятад, Энэтхэг, Шинэ Зеланд, Өмнөд Солонгос, Орос зэрэг найман харилцагч орны төлөөлөгчид цугларах төлөвтэй байна.