Тайланд Узбекистаны жуулчдад визгүй зорчих горимыг сэргээж магадгүй

Тайландын Аялал жуулчлал, спортын яам нь Узбекистан, Колумби, Мексикийн жуулчдад визгүй зорчих горимыг сэргээж, оршин суух хугацааг 15 хоногоор хязгаарлахыг дэмжиж байна гэж Тайландын Нэйшн сонин бичжээ. Энэ тухай Газета.уз сайт мэдээлэв.

Энэхүү шийдвэр нь визийн өргөдлийг шуурхай шийдвэрлэхэд тулгарч буй асуудал, мөн 9 дүгээр сарын 15-наас Узбекистан зэрэг 93 улсын иргэдийн 60 хоногийн визгүй зорчих эрхийг цуцалснаас хойш жуулчдын урсгал буурсантай холбоотой юм. Аялал жуулчлал, спортын сайд Сурасак Пханчароенворакул яам олон оронд нөлөөлж буй визийн удаашралын талаар мэдэж байгааг баталсан бөгөөд яам 11 дүгээр сарын 9-нд болох Визийн бодлогын хорооны хуралдаанаар аюулгүй байдлын эрсдэл багатай орнуудад 15 хоног визгүй зорчих эрх олгох асуудлыг хэлэлцүүлэхийг санал болгоно.

Яамны мэдээлснээр, Узбекистаны иргэд Москва дахь Тайландын Элчин сайдын яаманд хандах шаардлагатай болж, виз авах журам нь туйлын төвөгтэй болсон. Сонины бичсэнээр, энэхүү хүндрэлтэй үйл явцаас болж орон нутгийн аялал жуулчлалын агентлагууд Тайланд руу хийх аяллын багцаа цуцалж, Вьетнам зэрэг өрсөлдөгч чиглэлийг сонгож эхэлжээ.

Узбекистаны Гадаад хэргийн яамны хэвлэлийн төлөөлөгч Омонулла Файзиев Тайланд визийн горим нэвтрүүлэхээс өмнө яам иргэдэд илүү таатай нөхцөл бүрдүүлэхээр ажиллаж байгааг хэлж байсан. «Бид энэ журмыг өөрчлөх талаар Тайландын талтай хэлэлцээ хийж байна» гэж тэрбээр хэлсэн юм. Яамны төлөөлөгчийн хэлснээр, Бангкок дахь Узбекистаны Ерөнхий консулын газар сүүлийн саруудад визийн горимыг зөөлрүүлэх хэлэлцээ хийж байгаа бөгөөд 10 дугаар сарын 28-ны лхагва гарагт Тайландын Гадаад хэргийн яамтай хэлэлцээ хийхээр төлөвлөжээ.