Казахстан Вашингтоны бизнесийн чуулганд уул уурхай, боловсруулах салбарын давуу талаа танилцуулжээ

Казахстан ураны түлшнээс эхлээд нисэх онгоцны үйлдвэрлэлд хэрэглэдэг титан хүртэл АНУ-ын чухал ашигт малтмалын нийлүүлэлтийн сүлжээнд зайлшгүй шаардлагатай материал аль хэдийн үйлдвэрлэдэг гэж Канат Шарлапаев 11 дүгээр сарын 10-нд Вашингтонд болсон Бизнесийн 20-ийн чуулганд хэлснийг Зэ Таймс оф Сентрал Эйша сайт мэдээлжээ. Шарлапаев Казахстаны Атамекен үндэсний бизнес эрхлэгчдийн танхимын тэргүүлэгчдийн дарга юм.

“Бид зөвхөн байгалийн баялагтай орон биш, боловсруулах үйлдвэртэй орон” гэж Шарлапаев хэлээд, Америкийн хөрөнгө оруулалтыг татах дөрвөн давуу тал буюу ашигт малтмалын арвин нөөц, хөрөнгө оруулагчийн хамгаалалт, тээврийн дэд бүтэц, мэргэшсэн ажиллах хүчийг дурджээ.

АНУ-ын Эрчим хүчний мэдээллийн албаны мэдээгээр, 2025 онд Америкийн иргэний атомын цахилгаан станцуудын худалдан авсан ураны 28 хувийг Казахстан нийлүүлж, Канадын дараа хоёрдугаарт оржээ. Казахстаны засгийн газрын тоо баримтаар, тус улс дэлхийн нисэх онгоцны титаны зах зээлийн 20 орчим хувийг эзэлдэг.

Шарлапаевын хэлснээр, Казахстанд 23 мянган км төмөр зам байдаг. Тус улс жил бүр 3000 орчим геологич, уул уурхайн инженер бэлтгэдэг. Энэ нь 20 сая орчим хүн амтай орны хувьд их тоо юм.

АНУ-ын Төрийн департаментын арилжаа, бизнесийн асуудал хариуцсан тусгай төлөөлөгч Винай Чавла Төв Азид хөрөнгө оруулахад “биелэгддэг гэрээ, урьдчилан таамаглах боломжтой тусгай зөвшөөрөл, мөнгө орж ирсний дараа өөрчлөгддөггүй дүрэм” чухал гэдгийг онцолжээ.

Чавла АНУ-ын Олон улсын хөгжлийн санхүүжилтийн корпорацийн дэмжлэгтэй 1.8 тэрбум ам.долларын Орион чухал ашигт малтмалын консорциумыг дурдаж, Төв Азийг ийм хөрөнгө оруулалтын боломжит чиглэл хэмээн тодорхойлжээ.

Төв Ази, АНУ-ын бизнесийн яриа хэлэлцээний бүс нутгийн дараагийн форум 2027 оны 4 дүгээр сарын 20-21-нд Тажикистаны Душанбе хотод болно.