Казахстаны Үндэсний банк анх удаа токенжүүлсэн богино хугацаат үнэт цаас худалдлаа

Казахстаны Үндэсний банк арваннэгдүгээр сарын 9-нд Казахстаны хөрөнгийн биржид болсон дуудлага худалдаагаар богино хугацаат үнэт цаасаа анх удаа дижитал токен хэлбэрээр худалджээ.

The Times of Central Asia сайтын мэдээлснээр, токенжүүлсэн үнэт цаасны хэмжээ 10 тэрбум тенге буюу 22.3 сая орчим ам.доллар болж, нэрлэсэн үнээр нийт 50 тэрбум тенгегийн гаргалтын тавны нэгийг эзэлжээ.

Ердийн болон токенжүүлсэн үнэт цаасыг хамт худалдаж, хоёуланд нь ижил үнийн дүрэм мөрдсөнөөр дижитал платформ одоогийн үнэт цаасны зах зээлтэй зэрэгцэн хэрхэн ажиллахыг туршсан гэж төв банк мэдэгджээ.

Дуудлага худалдааны дүнгээр, эрэлт нэрлэсэн үнээр 70.2 тэрбум тенгед хүрсэн нь санал болгосон хэмжээнээс 40 орчим хувиар их байв. Үнэт цаасыг хямдралтай худалдсан тул хүлээн авсан захиалгын дүн 48.1 тэрбум тенге болжээ. Үүнээс 9.6 тэрбум тенге нь токенжүүлсэн үнэт цаасных байна. Жилийн жигнэсэн дундаж өгөөж 15.72 хувь байв.

Бирж төлбөр тооцооны өдрийг 2026 оны арваннэгдүгээр сарын 11 гэж тогтоосон бөгөөд үнэт цаасны 91 хоногийн хугацаа энэ өдрөөс эхэлнэ. Эргүүлэн төлөлтийг 2027 оны хоёрдугаар сарын 10-нд эхлүүлэхээр товложээ.

Казахстанд дижитал санхүүгийн хөрөнгө гаргах, арилжаалах дүрэм 2026 оны тавдугаар сарын 1-нээс хүчин төгөлдөр болсон юм. Төв банкны мэдээллээр, тус бирж дижитал санхүүгийн хөрөнгийн платформ болон дижитал хөрөнгийн арилжааны платформ ажиллуулахаар бүртгүүлсэн анхны компани болжээ. Мөн аравдугаар сарын 27-нд ALTA Telecom харилцаа холбооны компани тус биржийн платформоор хүүтэй дижитал үнэт цаас гаргасан байна.