Хакерууд Францын цусны албаны хүйтэн агуулахад халдаж, температурыг өсгөжээ

Хакерууд Францын цусны албаны гурван хүйтэн агуулахын удирдлагын системд нэвтэрч, температурыг нэмжээ гэж Гардиан сонин мэдээлэв.

Даваа гарагийн шөнө гарсан халдлагаар температур, гэсгээх босгыг «маш өндөр түвшинд» хүргэсэн гэж тус алба мэдэгдсэн байна. Дохиолол ажилласнаар техникийн ажилтнууд бүтээгдэхүүн муудахаас өмнө амжиж оролцсон аж.

Алба өөрөө шууд бай болоогүй, халдлага гэрээт компаниудын агуулахад тулсан гэж тайлбарлажээ. Тэнд хадгалж байсан сийвэнгийн уутнуудыг өөр газар шилжүүлсэн байна.

Энэ алба улсын 1900 гаруй эмнэлгийг цус, сийвэн, ялтас эсээр хангадаг.

Мөн энэ үеэр Европын арав гаруй орны супермаркетад хөргөгч, хөлдөөгчийн температур 50 хэм хүртэл өсөж, олон сая еврогийн хүнс гэмтжээ.

«Эдгээр нь тусгаарлагдсан тохиолдол биш бөгөөд мэдээж бид ийм кибер халдлагад хамтдаа тэсвэртэй, бэлтгэлтэй байх ёстой» гэж ЕХ-ны төлөөлөгч Тома Ренье хэлсэн байна. Халдлагын сэдэл тодорхойгүй, хэн ч хариуцлага хүлээгээгүй юм.

Софос компанийн захирал Рейф Пиллинг хамгийн үнэмшилтэй хувилбар нь төрийн зүгээс чадвараа харуулсан дохио, эсвэл ганц бие хакер гэж үзжээ.

Албаны мэдээллээр Францын кибер аюулгүй байдлын агентлаг, Эрүүл мэндийн яаманд мэдэгдэж, бүх тоног төхөөрөмжийн хяналтыг чангатгасан байна.