Хууль боловсруулахдаа хиймэл оюун ухаанд хэт найдахгүй байхыг Европын парламентын дарга анхааруулав

Европын парламентын дарга Роберта Метсола шийдвэр гаргахдаа хиймэл оюун ухаанд хэт найдахгүй байхыг гишүүддээ Лхагва гарагт анхааруулжээ гэж Политико Юроп сайт мэдээлэв.

«Хиймэл оюун ухааны тусламжтай нэмэлт өөрчлөлт боловсруулах нь хамт олонтойгоо хийх бүтээлч хэлэлцүүлгийг үндсээр нь орлож чадахгүй» гэж тэрбээр хэлсэн байна.

Хиймэл оюун ухаан ашигласан бол хүмүүс үүнийг мэдэх ёстой гэж Метсола онцолжээ.

Ерөнхий нарийн бичгийн дарга Алессандро Киокетти парламент эмзэг ажилд зориулж дотоод дэд бүтэц дээрээ өөрийн хэрэгсэл бүтээж байгаа гэж хэлсэн аж.

Албан тушаалтнуудын хэлснээр хиймэл оюун ухаанаар бичсэн нэмэлт өөрчлөлт огцом нэмэгдэж, зарим нь байхгүй хуулийг иш татсан байна.

«Манай хуульчид Чат-Жи-Пи-Ти буруу гэдгийг батлахад л хоёр өдөр зарцуулсан» гэж Киокетти нэгэн гишүүний тохиолдлыг дурдан ярьжээ.

Шинэ удирдамжийг удирдлагад удахгүй өргөн барих бөгөөд ажилтнуудад зориулсан одоогийн удирдамж 2024 оных юм.