Хойд Солонгос далавчит пуужин, олон хошуут пуужин харвагч, нисгэгчгүй онгоцны үзүүлэх туршилт хийжээ

Хойд Солонгос амиа золиослогч нисгэгчгүй онгоц, далавчит пуужин, хэт том калибрын олон хошуут пуужин харвагч оролцуулсан зэвсгийн үзүүлэх туршилт хийсэн гэж тус улсын төрийн хэвлэл мэдээлэл баасан гарагт мэдээлжээ. Энэ тухай Ёнхап агентлаг мэдээлэв.

Солонгосын Төв мэдээллийн агентлагийн мэдээлснээр туршилтыг пүрэв гарагт удирдагч Ким Чен Ыны оролцсон нисгэгчгүй нисэх технологийн үзэсгэлэнтэй холбогдуулан хийжээ. Тэр өдөр Өмнөд Солонгосын Нэгдсэн штаб Вонсан орчмоос Зүүн тэнгис рүү харвасан 10 орчим богино тусгалын баллистик пуужин илрүүлсэн юм.

Туршилтад тактикийн амиа золиослогч нисгэгчгүй онгоц, далавчит пуужин, 600 миллиметрийн олон хошуут пуужин харвагч оролцсон бөгөөд агентлагийн мэдэгдлээр нисгэгчгүй онгоцноос харвасан пуужин болон далавчит пуужингууд арал дээрх байг 100 хувийн оновчтой оносон аж.

Ким Чен Ын үгэндээ орчин үеийн дайнд нисгэгчгүй нисэх технологи чухал болохыг онцолж, тус улсын энэ чадавхыг хурдан өргөжүүлэхийг уриалжээ. Мөн эрдэмтдийг нисгэгчгүй нисэх технологи, батлан хамгаалахын хиймэл оюун ухааны салбарт ахиц гаргахыг уриалсан байна.

Пүрэв гарагийн харвалт нь Хойд Солонгосын энэ оны 17 дахь баллистик пуужингийн харвалт бөгөөд 10 дугаар сарын 12-ны харвалтаас хойш 17 хоногийн дараа болжээ. Сөүлийн цэргийн албан тушаалтан харвалтад Пхеньяны тактикийн цөмийн цэнэгт хошуу суурилуулах боломжтой гэж мэдэгддэг 600 миллиметрийн олон хошуут пуужин харвагчийг ашигласан бололтой гэж үзэж байна.