Өмнөд Солонгосын аж үйлдвэрийн үйлдвэрлэл есдүгээр сард 15 жилийн хамгийн хурдан өсчээ

Өмнөд Солонгосын аж үйлдвэрийн үйлдвэрлэл есдүгээр сард өмнөх сараас 15 гаруй жилийн хамгийн хурдан хэмээр өсөж, жижиглэнгийн худалдаа, тоног төхөөрөмжийн хөрөнгө оруулалт ч нэмэгджээ. Энэ тухай Ёнхап агентлаг мэдээлэв.

Мэдээлэл, статистикийн яамны мэдээллээр аж үйлдвэрийн үйлдвэрлэл есдүгээр сард өмнөх сараас 3 хувиар өссөн нь 2011 оны гуравдугаар сарын 3.4 хувийн өсөлтөөс хойших хамгийн огцом өсөлт юм. Мөн зургадугаар сараас хойш гурван гол үзүүлэлт анх удаа нэгэн зэрэг өсчээ.

Эдийн засгийн гол тулгуур болох уул уурхай, боловсруулах үйлдвэрийн салбарын үйлдвэрлэл 9 хувиар өссөний гол хөдөлгөгч нь 19.2 хувиар өссөн хагас дамжуулагчийн үйлдвэрлэл байв. Яамны үзэж байгаагаар санах ойн чипийн үйлдвэрлэл нэмэгдсэн нь өсөлтөд нөлөөлжээ.

Автомашины үйлдвэрлэл сэлбэг хэрэгсэл, эрлийз загварын үйлдвэрлэл нэмэгдсэний ачаар 39.9 хувиар өссөн бөгөөд дотоодын автомашин үйлдвэрлэгчдийн ажил хаялт, зуны амралтын улирал дууссан нь ч нөлөөлсөн байна.

Хувийн хэрэглээний үзүүлэлт болох жижиглэнгийн худалдаа 3.6 хувиар, тоног төхөөрөмжийн хөрөнгө оруулалт 5.3 хувиар нэмэгджээ.

Харин эмнэлгийн, нарийн хэмжилтийн болон оптик багажийн үйлдвэрлэл 8.8 хувиар буурсан байна.