Хойд Солонгосын Гадаад хэргийн сайд Их долоогийн цөмийн зэвсгээс татгалзах уриалгыг няцаав

Хойд Солонгосыг цөмийн зэвсгээс ангижруулах тухай тэргүүлэх орнуудын хамтарсан уриалгыг Хойд Солонгосын Гадаад хэргийн сайд Цой Сон Хи пүрэв гарагт буруушааж, тус улс цөмийн зэвсгээ хөгжүүлэх эрмэлзэл нь “тууштай” хэвээр байгаа гэдгээ мэдэгдлээ.

Хөгжингүй Их долоон орны гадаад хэргийн сайд нар энэ долоо хоногийн эхээр Парист уулзалт хийж, хамтарсан мэдэгдэл гаргасны дараа Цой Сон Хи төрийн хэвлэлээр тайлбар нийтэлжээ.

Сайд нар хамтарсан мэдэгдэлдээ Хойд Солонгосын хууль бус цөмийн зэвсэг, баллистик пуужингийн хөтөлбөрийг хатуу буруушааж, НҮБ-ын Аюулгүйн зөвлөлийн тогтоолын дагуу Хойд Солонгосыг “бүрэн цөмийн зэвсэггүй” болгох амлалтаа дахин нотолжээ. НҮБ-ын Аюулгүйн зөвлөлийн тогтоолууд Пхеньянд ийм зэвсэг бүтээхийг хориглодог.

“Манай улсын үндсэн хуулиар олгогдсон эрхийн талаарх Их долоогийн хорон санаат шүүмжлэлийг би хатуу буруушааж, няцааж байна. БНАСАУ цөмийн зэвсэг эзэмших тууштай хүсэл зоригоо хамгийн тодорхой үгээр дахин нотолж байна” гэж Цой Сон Хи Солонгосын Төв телеграфын агентлагаар нийтлэгдсэн тайлбартаа дурджээ.

“Цөмийн зэвсэг эзэмшиж байгаа нь манай үндэсний бүрэн эрхт байдлыг хангах хамгийн хүчтэй баталгаа гэсэн бидний дүгнэлт, байр суурь өөрчлөгдөхгүй” гэж тэрбээр хэлэв.

Хойд Солонгосыг цөмийн зэвсгээс ангижруулах зорилго онолын хувьд ч, практикийн хувьд ч хэрэгжих боломжгүй гэж Цой Сон Хи үзэж байна. Их долоогийн гишүүн АНУ, Их Британи зэрэг орнууд өөрсдөө цөмийн зэвсэгтэй тул АНУ болон түүний холбоотнууд давхар стандарт баримталж байна гэж тэрбээр буруутгав.

“Их долоо бусдын цөмийн асуудалд өө сэв хайж, тайлбар хийх эрхгүй” гэж тэрбээр мэдэгджээ.

Хойд Солонгос цөмийн зэвсэг эзэмшиж байгаа нь бүрэн эрхээ хууль ёсоор хэрэгжүүлж буй хэрэг гэж тэрбээр дахин сануулав. Тус улс аль хэдийн цөмийн зэвсэгтэй болсон нь Их долоо “стратегийн бүтэлгүйтэл” хүлээснийг нотолж байна гэжээ.

“Үүнийг үгүйсгэх аливаа оролдлого бол бодит байдлаас нүүр буруулж, БНАСАУ-ын эсрэг сөргөлдөөнд чиглэсэн дайсагналаа ил гаргаж буй хэрэг” гэж Цой Сон Хи нэмж хэлсэн байна.