Хойд Солонгосын мина тавилт 2001 оноос хойших хамгийн томд тооцогдож магадгүй

Редакцийн тайлбар: энэ мэдээг Америкийн дуу хоолойн солонгос хэлний нийтлэлээс орчуулав.

Өмнөд Солонгосын Нэгдсэн штаб өнгөрсөн сард Үндэсний ассамблейн тагнуул, батлан хамгаалахын хорооны гишүүдэд Хойд Солонгос 2024 оноос хойш Цэрэггүй бүсэд 960 мянга орчим мина тавьсан гэж мэдэгджээ.

Өмнөд Солонгосын хэвлэл парламентын гишүүдийн албыг иш татан арми энэ тооцоог аравдугаар сарын сүүлээр танилцуулсан гэж мэдээлсэн байна.

Америкийн дуу хоолой Газрын мина хориглох олон улсын кампанид хандсан боловч тус кампани энэ тоог бие даан баталгаажуулж, хэрхэн тооцсоныг тайлбарлаж чадахгүй гэжээ.

Хэрэв 960-мянган мина гэсэн тоо үнэн бол энэ нь «дэлхийн хаана ч ашигласан явган цэргийн эсрэг минын хамгийн том тохиолдлын нэг» болно гэж кампани хэлжээ.

Гэхдээ энэ нь хамгийн том нь биш юм. АНУ-ын Төрийн департаментын мэдээлснээр Украины дайнд Орос 2022 оноос хойш 2 сая гаруй мина тавьсан гэж олон улсын шинжээчид тооцдог.

Хойд Солонгосын мина Цэрэггүй бүсийн гадна усаар хөвж очиж, энгийн иргэд, цэргүүдэд мөчөө алдах аюул учруулж болзошгүй гэж кампани анхааруулжээ.

Кампани 1997 онд Жоди Уильямстай хамт Нобелийн энх тайвны шагнал хүртсэн юм.

Үүнээс гадна Нэгдсэн штаб аравдугаар сарын 5-нд Цэрэггүй бүсийн Өмнөд Солонгосын хяналтын хэсэгт санаатайгаар суулгасан Хойд Солонгосын мина есдүгээр сарын 21-ний дэлбэрэлтийг үүсгэж, Өмнөд Солонгосын гурван цэрэг шархадсан гэж дүгнэжээ.

НҮБ-ын Командлалтай хамтарсан шалгалт, шинжилгээнд үндэслэн эдгээр минаг усаар урсаж ирсэн биш, суулгасан гэж арми мэдэгдсэн байна.

Хойд Солонгос хариуцлагаа няцаажээ. Пхеньян аравдугаар сарын 25-нд НҮБ-ын Аюулгүй байдлын зөвлөлийн даргад илгээсэн захидалдаа энэ явдлыг хилийн бэхлэлтэд саад болж, хурцадмал байдлын бурууг бусдад тохох гэсэн Өмнөд Солонгосын зохиомол гэж нэрлэжээ.