Сөрөг хүчин Тайландын нарны хавтангийн хөтөлбөрийг авлигатай холбон буруутгажээ

Тайландын Ард түмний намын гишүүн Супачот Чайясат айл өрхөд нарны хавтан суурилуулахад 50 мянган бат олгох хөтөлбөр олон нийтэд биш, цөөн компанид ашигтай байх эрсдэлтэй гэж мэдэгдсэнийг Бангкок Пост сонин мэдээлжээ.

Түүний хэлснээр анх 600 орчим компани сонирхсон ч өрх тус бүрт 60 мянга гаруй батын санхүүгийн баталгаа шаардсанаас суурилуулагчдын 60-70 хувь татгалзжээ. Мөн 60 гаруй компани нэг хаягтай, 120 гаруй нь захирал, хувьцаа эзэмшигчээрээ холбоотой гэж тэрбээр хэлсэн байна.

Гүйцэтгэгчдэд нэг суурилуулалтад 110 мянган бат санал болгож байхад хэрэглэгчдээс 140 мянган бат авч байна гэж Супачот буруутгажээ.

Хувийн хэвшлийн ижил ажил 100 мянган бат орчим үнэтэй бөгөөд нэг суурилуулалт бүрт 30 мянган батын хахууль авсан гэх мэдээлэл бий гэж тэрбээр нэмжээ. Сангийн сайд Экнити Нититанпрапас татаасын хуваарилалтыг тайлбарлах ёстой бөгөөд чадахгүй бол хөтөлбөрийг цуцлах хэрэгтэй гэж тэрбээр үзэж байна.

Намын дэд дарга Вийраюут Канчучат Засгийн газар зээлсэн мөнгөөр Хятадын үйлдвэрлэгчид, Тайландын зуучлагчдад ашиг өгч байна гэж буруутгажээ. Сөрөг хүчин асуудлыг парламентаар, тэр дундаа итгэл үл хүлээлгэх хэлэлцүүлгээр хөөцөлдөж магадгүй аж.

Дотоод хэргийн дэд сайд Полапи Сувунчви шалгалт явуулахыг даалгасан байна. Гүйцэтгэгчдийг хэрхэн сонгож, төлбөрийг хэрхэн тогтоосныг тодруулахыг Мужийн цахилгааны газрын даргаас шаардах юм.