Хойд тэнгисийн замаар дамжин өнгөрөх ачаа тээвэр 2026 онд дээд амжилт шинэчилнэ

Интерфакс агентлагийн мэдээлснээр, Хойд тэнгисийн замаар дамжин өнгөрөх ачаа тээвэр 2026 онд 7 сая тонноос давж, дээд амжилт шинэчлэх бөгөөд энэ нь өнгөрсөн оныхоос бараг 2 дахин их юм. Энэ тухай Росатом төрийн корпорацийн Хойд тэнгисийн зам, Арктикийг хөгжүүлэх асуудал хариуцсан захирал, Арктикийн газрын дарга Владимир Панов агентлагт өгсөн ярилцлагадаа хэлжээ.

Росатомын хүлээлтээр 2026 онд уг маршрутын нийт ачаа эргэлт дээд амжилт болох 40 сая тонноос давна. Пановын хэлснээр, Хойд тэнгисийн зам үр ашиг, аюулгүй байдал гэсэн хоёр гол давуу талтай. Зун, намрын улиралд Азиас Европ хүрэх энэ зам Суэцийн сувгаар дамжих замаас 30 хувиар богино тул ачаа илгээгчид фрахтын зардлаа хэмнэж, бүтээгдэхүүнээ хурдан эргэлтэд оруулж чаддаг аж.

«Энэ жил транзит тээвэр ч дээд амжилт шинэчилнэ. Бид 7 сая гаруй тонн ачаа тээвэрлэх магадлал өндөр байна» гэж Панов хэлэв. Тэрээр Арктикт олборлосон бус, зөвхөн уг замаар дамжин өнгөрөх ачааны хэмжээ өнгөрсөн онтой харьцуулахад бараг хоёр дахин өсөх нь тодорхой нээлт гэж онцолжээ.

Транзит тээврийн дотор чингэлэг тээвэр ч өсч байна. Пановын хэлснээр, 2025 онд Хойд тэнгисийн замаар 23 удаа транзит чингэлэг тээвэрлэлт хийсэн бол энэ онд энэ тоо хоёр дахин нэмэгдэж, 46 болжээ. Олон улсын чингэлэгийн транзит тээвэр 600 мянга гаруй тонн болж, дахин дээд амжилт тогтооно.