Хонконгийн Тай По түймрийн бие даасан шалгалт гүйцэтгэгч, хяналтын компанийг гол буруутан гэж тогтоожээ

Хонконгийн Тай По дүүргийн Ван Фук Корт орон сууцны хороололд 168 хүн амь үрэгдсэн түймрийг шалгасан бие даасан хорооны тайланд засварын ажлыг хариуцсан хоёр компанийг гамшгийн гол буруутан гэж нэрлэснийг Хонконг Фри Пресс сайт мэдээлжээ.

Мянга гаруй хуудастай тайланд гүйцэтгэгч Престиж Констракшн энд Инжиниринг компанийн галд тэсвэргүй тор, хөөсөн хавтан ашиглаж, гал гарах гарцын галд тэсвэртэй цонхыг авсныг хяналтын зөвлөх Вилл Пауэр Аркитектс компани хянаагүй гэж дүгнэжээ.

«Тэд түймэр гарч, олон хүн амь үрэгдэхэд буруутай гол этгээдүүд гэдэгт эргэлзээ байхгүй» гэж тайланд дурдсан байна.

Орон сууцны товчооны дэргэдэх Бие даасан шалгалтын нэгж, Барилгын газар хяналтын үүргээ биелүүлээгүй гэж тайланд дүгнэжээ. Нэгж шалгалтаа урьдчилан мэдэгддэг байсан тул гүйцэтгэгч стандартад нийцсэн дээж бэлтгэж чаддаг байв. Гүйцэтгэх захирал Жон Ли тайлангийн дараа хохирогчид болон олон нийтээс уучлалт гуйж, Орон сууцны сайд Винни Хо огцорсон.

Түймрээс өмнө оршин суугчид ажилчид тамхи татаж, гал гарах гарц хаагдсан, хөөсөн хавтан ашигласан зэргээр төрийн байгууллагуудад 180 гомдол, лавлагаа гаргаж байсан ч хэлтсүүд асуудлыг бие биедээ шилжүүлж байжээ.

Хороо гал түймрийн аюулгүй байдлын журам, засгийн газрын хяналтын цоорхойг арилгах 120 зөвлөмж гаргасан бөгөөд засгийн газар Ерөнхий нарийн бичгийн дарга Эрик Чан тэргүүтэй удирдах хороо байгуулж хэрэгжилтийг хянахаар болжээ.

Түймэр гарсны дараа 999 дугаарт залгасан хоёр дуудлагыг гал унтраах албанд шилжүүлээгүй, тэр хоёр хүн хоёулаа амь үрэгдсэн ч хороо дуудлага хүлээн авах журамд тогтолцооны алдаа илрээгүй гэж дүгнэсэн байна.