Мерц Баварийн парламентын дарга Ильзе Айгнерийг Германы анхны эмэгтэй ерөнхийлөгчид нэр дэвшүүлэхээр болжээ

Германы Канцлер Фридрих Мерц Баварийн мужийн парламентын дарга Ильзе Айгнерийг ерөнхийлөгчид нэр дэвшүүлэхээ ням гарагийн орой зарласныг Эр Эф Ай радио Христийн ардчилсан холбооны дотоод эх сурвалжид тулгуурлан мэдээлжээ. Айгнер сонгогдвол Германы түүхэнд анх удаа эмэгтэй хүн ерөнхийлөгч болно.

Мерц Берлинд намын албан тушаалтнуудтай оройн зоог барих үеэр Айгнерийг даваа гарагт албан ёсоор нэр дэвшүүлэхээ мэдэгджээ. Эвслийн намууд дэмжиж буй тул тэрбээр нэгдүгээр сарын 30-нд Бундестаг, Бундесратын гишүүд болон иргэний нийгмийн төлөөлөл зэрэг 1260 орчим сонгогчийн саналаар сонгогдох нь бараг тодорхой.

Тэрбээр 2017 оноос хойш ерөнхийлөгчөөр ажиллаж буй Социал демократ намын Франк-Вальтер Штайнмайерыг залгамжлах юм.

«Тэр Германы улс төрийг маш сайн мэддэг, хүмүүстэй ойр, сонсож чаддаг» гэж Бранденбургийн Социал демократ намын удирдагч Дитмар Войдке Политико сайтад хэлсэн байна.

Ангела Меркелийн засгийн газарт хөдөө аж ахуйн сайд байсан 61 настай Айгнер Октоберфестэд Баварийн уламжлалт хувцастай оролцдогоороо олонд танигдсан.

Тэрбээр мужийн парламент дахь хэт барууны Германы төлөө хувилбар намын фракцтай хатуу боловч эелдэг харьцдаг гэгддэг бөгөөд тус нам одоо улсын хэмжээнд 28 орчим хувийн дэмжлэгтэй байна.