Хятадын Дээд шүүх, прокурорын газар цалин, хувьцаагаар далдалсан авлигын жишиг хэргүүдийг нийтэлжээ

Хятадын Ардын дээд шүүх, Ардын дээд прокурорын газар авлигын шинэ, далд хэлбэрийн гэмт хэрэгт ял оноосон 6 жишиг хэргийг саяхан хамтран нийтэлжээ.

Хятадын мэдээний сүлжээний мэдээлснээр, тэдгээрийн нэг нь төрийн хяналттай нэгэн банкны орлогч ерөнхийлөгч асан Жан гэх этгээдийн хэрэг юм. Тэрбээр 2018 оны наймдугаар сард нэгэн хөрөнгө оруулалтын компани хувь эзэмшдэг компанид 150 сая юанийн зээл авахад тусалжээ. Талархлын үүднээс хөрөнгө оруулалтын компанийн удирдах зөвлөлийн дарга түүнийг банкнаас гарсных нь дараа удирдах зөвлөлд нэр төдий суулгаж, цалин олгох санал тавьсныг Жан зөвшөөрчээ.

Жан 2018 оны арваннэгдүгээр сараас 2021 оны гуравдугаар сар хүртэл хоёр жил гаруй тус компанийн удирдах зөвлөлийн дэд даргаар ажиллахдаа ганцхан удаа хуралд суусан ч 3.89 сая юань цалин авчээ. Эхнэр нь мөн өөр компанид бие даасан захирлаар бүртгэгдэж, бараг ажил хийлгүйгээр 400 мянган юань авсан байна. Шүүх Жаныг хахууль авах, нөлөөгөө ашиглан хахууль авах гэмт хэрэгт гэм буруутайд тооцож, арван хоёр жил зургаан сарын хорих ял оноож, 1.3 сая юанийн торгууль ногдуулжээ.

Төрийн нэгэн группийн удирдах зөвлөлийн дарга асан Жоугийн тусалсны хариуд автомашины групп түүний ойр дотны хүнийг тусгайлан бий болгосон албан тушаалд томилж, 6 жил гаруйн хугацаанд 11.74 сая юанийн цалин, урамшуулал, автомашин олгожээ. Прокурорууд илүү гарсан 8.15 сая юанийг хахууль гэж тооцжээ. Шүүх Жоуг нийт 44.78 сая юанийн хахууль авсан гэм буруутайд тооцож, арван гурван жилийн хорих ял оноож, 2.4 сая юанийн торгууль ногдуулав.

Дүүргийн дэд дарга асан У нэгэн компанид хөрөнгө оруулалт татах, төсөл батлахад тусалсныхаа хариуд тус компанийн 3 сая юанийн хувьцааг биржид гарахаас нь өмнө худалдан авах эрх авчээ. 2023 онд компанийн хууль ёсны төлөөлөгч Шао хувьцааг зарж, 3 сая юанийн үндсэн дүн болон 3.67 сая юанийн ашгийг Ууд шилжүүлжээ. Прокурорууд бодит ашиг болох 3.67 сая юанийг хахууль гэж тооцсон байна.

Бусад хэрэгт хүүхдийнхээ компанид гэрээ олж өгсөн, хуурамч баримтаар зардлаа нөхүүлсэн албан тушаалтнууд багтжээ. Ашиг хэрхэн шилжсэн, албан тушаалын үйлдэлтэй ямар холбоотой болохыг тогтоосон нь эдгээр хэргийг гэмт хэрэгт тооцох гол үндэслэл болсон гэж мэдээнд дурджээ.