Мүленаар: Ирэх Конгресс Хятадын асуудлаарх хоёр намын хороог үргэлжлүүлэх ёстой

Редакцийн тэмдэглэл: энэ мэдээг VOA-ийн мандарин хэл дээрх анхны нийтлэлээс орчуулав.

Төлөөлөгчдийн танхимын Хятадын асуудлаарх тусгай хорооны дарга Жон Мүленаар арваннэгдүгээр сарын 9-нд нийтэлсэн мэдэгдэлдээ хорооны бүрэн эрхийг ирэх Конгресс сунгах ёстой гэж уриалжээ. Хууль тогтоогчид ирэх оны эхээр ажлаа эхлэхэд хороо Хятадын бодлогын талаарх хоёр намын ажлаа үргэлжлүүлэх ёстой гэж тэрбээр үзэж байна.

Тусгай хороо бараг дөрвөн жилийн турш Бүгд найрамдах, Ардчилсан намынхныг нэгтгэж, Хятадын Коммунист намаас Америкийн ашиг сонирхол, үнэт зүйлд учруулж буй ноцтой аюулыг сөрөн ажиллаж ирсэн гэж Мүленаар онцолжээ.

“Тусгай хороо бараг дөрвөн жилийн турш Бүгд найрамдах, Ардчилсан намынхныг нэгтгэж, Хятадын Коммунист намаас АНУ-ын ашиг сонирхол, үнэт зүйлд учруулж буй ноцтой аюулыг шийдвэрлэж ирлээ” гэж Мүленаар хэлэв. “Бид улс орноо бэхжүүлж, америк ард түмнийг хамгаалах чухал бодлогын өөрчлөлтийг хэрэгжүүлэхийн тулд бусад хороод болон аль аль намын засаг захиргаатай гар гараасаа хөтлөлцөн ажилласан” гэж тэрбээр нэмж хэлжээ.

Хятадын Коммунист нам АНУ-ын эдийн засаг, америк ажилчид, шинийг санаачлагчдыг мөлжиж буйг тус хороо ил болгосон гэж Мичиганы Бүгд найрамдах намын гишүүн хэлжээ. Тэрбээр мөн чухал ханган нийлүүлэлтийн сүлжээг хамгаалах, аюултай гэж түүний тодорхойлсон амбицаа хэрэгжүүлэхэд шаардлагатай нөөц, технологийг Бээжин олж авахаас сэргийлэх, эрх чөлөө, нэр төрийн төлөө тэмцэгчдийг дэмжих чиглэлээр хоёр нам хамтран ажилласныг онцолсон байна.

Ялангуяа хиймэл оюун ухааны технологийн өрсөлдөөн ширүүсч, Хятад АНУ-ын холбоотон, түншүүдийн эсрэг албадлагын үйлдлээ хурцатгасаар байгаа энэ үед АНУ-д тулгарч буй сорилт улам яаралтай болж байна гэж Мүленаар анхааруулав.

“Ирэх хоёр жил бол шийдвэрлэх үе бөгөөд тусгай хорооны хоёр намын бүрэн эрх, ажлаар энэ цаг үеийн шаардлагыг хангах боломж юм.”

АНУ ба Хятадын Коммунист намын стратегийн өрсөлдөөний асуудлаарх Төлөөлөгчдийн танхимын тусгай хорооны түүх.

2022 оны завсрын сонгуулиар Бүгд найрамдах нам Төлөөлөгчдийн танхимд олонх болсны дараа Хятадын асуудлаарх тусгай хороог 118 дугаар Конгрессын үеэр, 2023 оны нэгдүгээр сард байгуулсан. Хороог тухайн үеийн Төлөөлөгчдийн танхимын дарга, Калифорни мужаас сонгогдсон Бүгд найрамдах намын гишүүн Кевин Маккартигийн өргөн барьсан Төлөөлөгчдийн танхимын 11 дүгээр тогтоолоор байгуулжээ. Тогтоолыг 2023 оны нэгдүгээр сарын 10-нд Төлөөлөгчдийн танхим хоёр намын өргөн дэмжлэгтэйгээр 365 саналаар 65-ын эсрэг баталсан бөгөөд ирээгүй гишүүдээс бусад Бүгд найрамдах намын бүх гишүүн болон Ардчилсан намын 146 гишүүн дэмжсэн байна.

Хороо байгуулагдсан нь Хятадын эдийн засаг, технологи, цэрэг, геополитикийн нөлөө өсөн нэмэгдэж буй, мөн Хятадын Коммунист намын бодлого АНУ-ын үндэсний аюулгүй байдал, эдийн засгийн өрсөлдөх чадварт нөлөөлж буйд Вашингтонд хоёр намын санаа зовнил нэмэгдэж буйг илэрхийлсэн юм.

Уламжлалт байнгын хорооноос ялгаатай нь Хятадын асуудлаарх тусгай хороог түр хугацааны, мөрдөн шалгах, бодлогод чиглэсэн хороо болгон байгуулсан. Хороо Хятадын Коммунист намаас үүдэх сорилтын талаар хоёр намын зөвшилцөлд хүрч, эдгээр аюулыг сөрөх бодлогын зөвлөмж боловсруулах үүрэгтэй байв.

120 дугаар Конгресс 2027 оны нэгдүгээр сарын 3-нд хуралдаж, шинээр сонгогдсон хууль тогтоогчид тангараг өргөнө.