АНУ-ын Сангийн сайд Бессент Нвидиагийн үйлчлүүлэгч компанийн асуудлаар Худалдааны сайд Лутниктай маргажээ

АНУ-ын Сангийн сайд Скотт Бессент өнгөрсөн долоо хоногт Цагаан ордонд Худалдааны сайд Ховард Лутниктай маргалджээ. Маргаан Нвидиа компанийн үйлчлүүлэгч Мегаспид компанийг үндэсний аюулгүй байдалд заналхийлэгч компаниудын жагсаалтад оруулахгүй удааж буй асуудлаар өрнөсөн гэж Франс Интернэйшнл радио Аксиос сайтын 11-нд эх сурвалжуудыг иш татан бичсэн мэдээг дамжуулжээ.

Худалдааны яам эмзэг технологийн экспортыг хянадаг. Нвидиагийн гүйцэтгэх захирал Жэнсэн Хуан мэдээллүүдэд Хятадын тагнуулч байж болзошгүй гэж дурдсан Мегаспидийн удирдах ажилтан Элис Хуантай дотно харилцаатай байсан тухай мэдээлэл гарсны дараа Лутник юу хийсэн, юу хийгээгүй нь улам их анхаарал татах болжээ.

Аксиос сайтын онцгой мэдээллээр, өнгөрсөн Пүрэв гарагт Цагаан ордны нөхцөл байдлын өрөөнд болсон уулзалтын үеэр Бессент Хятадад чип экспортлоход тавьсан хяналт хэрхэн хэрэгжиж буй талаар шахаж, “Мегаспидийг яагаад аж ахуйн нэгжийн жагсаалтад оруулаагүй юм бэ?” гэж Лутникаас ил шаардан асуужээ.

Лутник асуултад бэлтгэлгүй байсан бөгөөд мэдэхгүй, шалгаж үзье гэж хариулсан аж. Худалдааны яам уг компанийн талаар тагнуулын санамж бичиг хүлээн авсны дараа бодит арга хэмжээ аваагүй нь Сангийн яам болон бусад байгууллагын дургүйцлийг төрүүлсэн гэж эх сурвалжууд хэлжээ.

Лутник уг компанийн эсрэг арга хэмжээ авбал Хятадтай хийж буй худалдааны дайн хурцдана гэж санаа зовж, Мегаспидэд хариуцлага тооцох гэсэн засгийн газрын бусад албан тушаалтны оролдлогыг өнгөрсөн жил “нурааж” байсан гэж нэгэн эх сурвалж Аксиос сайтад хэлжээ.

2025 оны намраас хойш Цагаан ордон болон тагнуулын байгууллагын өндөр албан тушаалтнууд Лутник болон түүний гол зөвлөхүүдийг Мегаспидийн эсрэг арга хэмжээ авахыг шахаж ирсэн ч татгалзсан хариу авсаар байжээ. Бессент өнгөрсөн Пүрэв гарагт энэ асуудлыг хөндсөн гэж эх сурвалжууд мэдээлжээ.