Кипр Оростой харилцаанаас АНУ-тай стратегийн түншлэл рүү шилжиж байна

Кипр олон арван жил Москватай ойр харилцаатай байсан ч АНУ-тай стратегийн ойртож, геополитикийн томоохон өөрчлөлт хийж байна гэж Дойче Велле радио мэдээлэв.

АНУ-ын шинэ элчин сайд Жон Бреслоу 10 дугаар сарын 4-нд Пафос дахь агаарын баазыг шинэчлэх, АНУ-ын байлдааны хөлөг илүү олон удаа ирэх төлөвлөгөөг зарласан байна.

«АНУ ирээдүйд Киприйг хамгаална» гэж тэрбээр хэлсэн ч энэ нь албан ёсны аюулгүй байдлын баталгаа биш юм.

1960 онд тусгаар тогтносон Кипр 1961 онд Эвсэлд үл нэгдэх хөдөлгөөнийг үүсгэн байгуулагчдын нэг болжээ. 2004 онд ЕХ-нд элссэний дараа ч Москватай ойр байсан аж.

АНУ-тай харилцаанд 1974 онд Турк арал руу довтолсон явдал сүүдэрлэсэн юм. АНУ 1987 онд зэвсгийн хориг тавьсан нь Киприйн Үндэсний гвардийг Оросын зэвсэгт тулгуурлахад хүргэсэн байна.

2022 оны 2 дугаар сард Орос Украин руу довтолсон нь эргэлтийн цэг болжээ. «Бүгд Найрамдах Кипр анх удаа Барууныг илэн далангүй, эргэлзээгүйгээр сонгосон» гэж Никосийн их сургуулийн дэд профессор Константинос Адамидес хэлсэн байна.

АНУ 2022 оны 9 дүгээр сард зэвсгийн хоригоо бүрэн түдгэлзүүлж, хугацааг 2027 оны 9 дүгээр сарын 30 хүртэл сунгажээ. Жо Байден 2025 оны 1 дүгээр сард Кипрт АНУ-ын батлан хамгаалахын худалдан авалтын хөтөлбөрт оролцох зөвшөөрөл өгсөн юм.

Кипр НАТО-гийн гишүүн биш бөгөөд 3 дугаар сард Акротири дахь Британийн баазад Ираны нисгэгчгүй онгоц унасны дараа элсэх тухай маргаан сэргэжээ. Туркийн байр суурийн улмаас улс төрийн нөхцөл бүрдээгүй байна.