Косовогийн Ерөнхий сайд Курти: Европын холбоонд нэр дэвшигчийн статус авахад бид бүх гэрийн даалгавраа хийсэн

Европын холбоонд элсэх хүсэлт гаргаснаас хойш дөрвөн жилийн дараа ч Косово нэр дэвшигч орны статус аваагүй байгаад тус улсын Ерөнхий сайд Албин Курти FRANCE 24 телевизэд өгсөн ярилцлагадаа харамсаж буйгаа илэрхийлжээ.

Косово 2008 онд Сербээс тусгаар тогтнолоо зарласан бөгөөд өөрийгөө Европын гэр бүлийн нэг хэсэг гэж үздэг.

“Европт нэр дэвшигчийн статусгүй цорын ганц улс нь бид. Учир нь Европын зөвлөл Европын комиссоос Косовогийн талаар дүгнэлт гаргахыг хүсээгүй байна. Хуулийн засаглал, авлигын эсрэг тэмцэл, ил тод байдал, хэвлэлийн эрх чөлөө, сонгуулийн ардчилал, либерал ардчиллын үзүүлэлтүүдээр бид бүх гэрийн даалгавраа хийсэн” гэж Курти хэлэв.

“Бид богино зам, арын хаалга, түргэвчилсэн зам хүсэхгүй байна. Гавьяа зүтгэлд суурилсан үйл явцыг хүсэж байна. Ойрын долоо хоног эсвэл саруудад нэр дэвшигчийн статус авна гэж найдаж байна” гэж тэрбээр нэмж хэлжээ.

Элсэх үйл явцыг эхлүүлэх асуулгыг Косовод илгээхгүй байгааг Ерөнхий сайд Европын зөвлөлийн “дотоод хөдлөл”-тэй холбон тайлбарлажээ. FRANCE 24-ийн тайлбарласнаар энэ нь Косовогийн тусгаар тогтнолыг хүлээн зөвшөөрөөгүй Испани, Кипр, Румын, Грек, Словак гэсэн таван улсыг хэлж байгаа юм.

Курти эдгээр таван улстай хамтын ажиллагаа, харилцаагаа улам идэвхжүүлж, Косовогийн тусгаар тогтнолыг хүлээн зөвшөөрдөг Европын холбооны 22 гишүүн оронд нэгдэхийг тэднээс хүссэнээ хэлжээ. Испани Косовогийн паспортыг хүлээн зөвшөөрсөн, Афин дахь төлөөлөгчийн газрын статус дээшилсэн нь эерэг дохио боловч хүлээн зөвшөөрөх алхам хараахан хийгдээгүй байна гэж тэрбээр хэлсэн. Гэхдээ Европын холбоо “хүлээн зөвшөөрөлтөд олон янз, хамтын ажиллагаанд нэгдмэл” гэсэн томьёогоор Косовотой тогтворжуулалт, холбооны хэлэлцээр байгуулж, визийн хөнгөлөлт олгосон тул эдгээр таван улс асуулга илгээхэд саад биш гэж Курти хэлжээ.

Косовогийн шинэчлэл, ялангуяа шүүхийн хараат бус байдлын талаар Европын комисс ноцтой эргэлзсэн хэвээр байгаа тухай асуултад хариулахдаа Курти шүүх, прокурорын талаарх шүүмжлэлийг хүлээн зөвшөөрч, шинэчлэл эхэлснийг онцолжээ.

“Бид тайлбарлах боломжгүй аргаар олсон хөрөнгийг шалгаж, хураах товчоо байгуулах гэж байна. Дундаж цалинтай атлаа том харш, бүр хэд хэдэн харштай байж болохгүй” гэж Курти хэлэв.

Сербийн Ерөнхийлөгч асан Александр Вучич парламентын олонхоо алдсан сонгуулийн дараа Приштина, Белградын харилцаанд шинэ бүлэг нээгдэх эсэхийг хэлэхэд эрт байна гэж Курти үзэж байна.

“Бид харилцан хүлээн зөвшөөрөлтөд төвлөрсөн Сербтэй харилцаагаа бүрэн хэвийн болгохыг хүсэж байна. 20 дугаар зуун руу буцах цаг хугацааны машин байхгүй” гэж тэрбээр хэлжээ.