Оросын томоохон компаниудын төлөөлөгчид Кабулд очиж Талибантай бизнесийн яриа хэлэлцээ хийв

Оросын Шадар сайд Алексей Оверчук тус улсын 70 бизнес эрхлэгчийн хамт Пүрэв гарагт Кабулд хүрэлцэн ирж, Талибаны засгийн газартай бизнесийн яриа хэлэлцээ хийснийг Афганистаны албаныхан мэдэгджээ. Тэдний хэлснээр, Оверчукийг хүндэт харуулаар угтжээ.

Оверчук Талибаны Ерөнхий сайд Мохаммад Хасан Ахунд, эдийн засгийн асуудал хариуцсан Шадар сайд Абдул Гани Барадар, Гадаад хэргийн сайд Амир Хан Муттаки нартай уулзав.

Афганистаны засгийн газрын X сүлжээнд нийтэлсэн мэдэгдлээр, Барадар Афганистаны эдийн засгийн хөгжил, хөрөнгө оруулалтын боломжийг танилцуулж, “стратегийн байршил, баялаг нөөц, 24 сая хүний ажиллах хүч”-ийг онцолжээ.

Барадар Оросын компаниудыг хөдөө аж ахуй, уул уурхай, авто болон төмөр зам, үйлдвэрийн бүтээн байгуулалтад хөрөнгө оруулах, Афганистанд эдийн засгийн тусгай бүс байгуулахыг урьж, Афганистаны хөдөө аж ахуйн бүтээгдэхүүнийг Орос руу экспортлох хэмжээг нэмэгдүүлэх хүсэлтэй байгаагаа илэрхийлэв.

Оверчук төлөөлөгчдийн бүрэлдэхүүнд Афганистанд аль хэдийн үйл ажиллагаа явуулж буй компаниуд орсныг дурдаад, “өөр олон компани энэ улсад ажиллаж эхлэхийг хүсэж байна” гэж хэлснийг Оросын нэгэн мэдээллийн агентлаг иш татжээ.

Тээвэр, логистик, хөдөө аж ахуй, эм зүйн салбарын компаниуд төлөөлөгчдийн дунд байгаа бөгөөд Афганистаны засгийн газар Оросын химийн бордоо болон “Афганистаны нутагт бордооны үйлдвэр барих” асуудлыг сонирхож байна гэж Оверчук хэлсэн байна.

Түүний тооцоогоор, 2026 оны эхний найман сард Орос, Афганистаны худалдаа хоёр дахин илүү өсөж, 349 сая ам.доллараас давжээ.

Орос 2025 оны долдугаар сард Талибаны засгийн газрыг албан ёсоор хүлээн зөвшөөрсөн бөгөөд Талибан 2021 оны наймдугаар сард АНУ цэргээ гаргасны дараа эрх мэдлийг булаан авснаас хойш ийм шийдвэр гаргасан цорын ганц улс болсон юм.