Ли Жэ Мён Чүнчон бүс нутгийн чипийн “мега төсөл”-ийг эхлүүлэх ёслолд оролцлоо

Өмнөд Солонгосын Ерөнхийлөгч Ли Жэ Мён Пүрэв гарагт Чүнчон бүс нутгийн өндөр технологийн аж үйлдвэрийн төслийг эхлүүлэх ёслолд оролцож, уг төслийг бүс нутаг, олон нийтэд үр өгөөжөө өгөхүйц байдлаар хэрэгжүүлэхээ амлажээ.

Ёслол Өмнөд Чүнчон мужийн Асан хотод байрлах Samsung Electronics-ийн хагас дамжуулагчийн савлагааны үйлдвэрт болов. Ингэснээр Засгийн газрын “мега төсөл”-ийн Чүнчон дахь хэсэг эхэлсэн байна.

Энэ оны эхээр танилцуулсан мега төслийн санаачилгаар бүс нутгуудад хагас дамжуулагчийн үйлдвэрлэлийн кластер байгуулж, дата төв, физик хиймэл оюун ухааны технологид хөрөнгө оруулна. Ингэж дэвшилтэт салбарууд болон хөгжлөөр хоцорсон бүс нутгийн өсөлтийг дэмжих зорилготой.

Samsung зэрэг компаниуд нийт 392 их наяд воны хөрөнгө оруулалтаар санах ойн чип савлах томоохон байгууламж барьж, Чүнчоныг энэ салбарын төв болгохоор төлөвлөжээ.

Чүнчон дахь төсөл нь баруун өмнөд хэсгийн Жолла зэрэг бүс нутагт хагас дамжуулагчийн шинэ үйлдвэрлэлийн кластер, хиймэл оюун ухааны дата төв байгуулах 4000 их наяд гаруй воны “гурван мега төсөл”-ийн нэг хэсэг юм.

Ерөнхийлөгч ёслол дээр үг хэлэхдээ энэ төсөл Чүнчон бүс нутгийг “том үсрэлт” хийхэд хүргэж, Өмнөд Солонгос дэвшилтэт салбарт дэлхийд тэргүүлэх үндсийг тавина гэж найдаж байна гэв.

“Мега төслийн санаачилга зөвхөн компаниудын үйлдвэрлэлийн байгууламжийг бүс нутаг руу өргөжүүлэхээр хязгаарлагдахгүй, жинхэнэ тэнцвэртэй улсын хөгжил, бүх нийтийн өсөлтийг бий болгоход хувь нэмрээ оруулахын тулд бид бодлогын бүх нөөцөө төвлөрүүлнэ” гэж Ерөнхийлөгч хэлжээ.

Засгийн газар захиргааны журам, дэд бүтцийн хөгжлөөр дамжуулан хөрөнгө оруулалтыг хэрэгжүүлэхэд дэмжлэг үзүүлнэ гэж тэрбээр амлав. Мөн төслүүд бүс нутгийн компани, худалдаачдад бизнесийн шинэ боломж олгож, тэнд амьдардаг залуучуудад ажлын байр бий болгоно гэж найдаж байгаагаа хэлсэн байна.