Мадагаскар Оростой цэргийн харилцаагаа өргөжүүлж байгаад АНУ санаа зовж буйгаа илэрхийлжээ

Мадагаскар Оростой цэргийн хамтын ажиллагаагаа өргөжүүлж байгаад АНУ санаа зовж буйгаа илэрхийлж, Баруун Африкт ийм түншлэл зэвсэгт бүлэглэлийн хүчирхийллийг таслан зогсоож чадаагүй гэж анхааруулсныг Африканьюс сайт мэдээлжээ.

АНУ-ын Африкийн командлалын орлогч командлагч, дэслэгч генерал Жон Бреннаны хэлснээр, Орос нөлөөгөө Сахелаас цааш өргөжүүлж магадгүй хэмээн Вашингтон санаа зовж байна. Сахелд цэргийнхний удирддаг засгийн газрууд аюулгүй байдлын тусламж авахаар Москва руу улам их хандах болсон юм.

Мали, Буркина Фасо, Нигер барууны уламжлалт холбоотнуудтайгаа цэргийн харилцаагаа тасалж, жихадист бүлэглэлүүдтэй тэмцэхэд Оросын дэмжлэг хүссэн ч халдлага үргэлжилсээр байна.

Бреннан Мадагаскар болон хөрш Мозамбик олон улсын далайн тээвэрт чухал ач холбогдолтойг онцолж, “Сахелын загвар” тэдгээр оронд тархахаас сэрэмжлүүлжээ. Мозамбикийн хойд хэсэгт үйл ажиллагаа явуулдаг зэвсэгт бүлэглэлүүд далайн чадавхаа хөгжүүлж байгаа тул далайн тээвэрт улам бүр заналхийлж болзошгүй хэмээн Вашингтон болгоомжилж байна.

Мадагаскарт 2025 онд цэргийнхэн засгийн эрхийг авснаас хойш Орос тус улсад зэвсэг, цэргийн зааварлагч нийлүүлж байна.

Ерөнхийлөгч Микаэль Рандрианирина Москватай ойртсоор байгаа бөгөөд хоёр улс саяхан Орос-Африкийн дээд хэмжээний уулзалтын үеэр батлан хамгаалах, худалдаа, аялал жуулчлалын гэрээ байгуулжээ. Тэрбээр 2 дугаар сард Москвад айлчилсан нь сүүлийн бараг тавин жилд Мадагаскарын удирдагчийн анхны албан ёсны айлчлал болсон юм.

Мадагаскар АНУ-ын анхааруулгад ил хариу өгөөгүй байна.