Мексикт буудуулж амиа алдсан картелийн тэргүүн олимпийн тамирчин асан Райан Веддингт тусалж байжээ

Өнгөрсөн долоо хоногт Мексикт цагдаагийн буудлагад амиа алдсан картелийн тэргүүн олимпийн тамирчин асан Райан Веддингт хар тамхи наймаалах, 2026 оны 1 дүгээр сард баривчлагдах хүртлээ эрх баригчдаас зугтахад тусалж байсан гэж АНУ-ын Хууль зүйн яам Мягмар гарагт мэдэгдсэн гэж Си Би Эс Ньюс мэдээлжээ.

Ил болгосон яллах дүгнэлтэд, “Генерал” хочит Эдгар Аарон Васкес Альварадо Веддингийн бүлэглэлд кокаин нийлүүлж, цагдаагийн шалган нэвтрүүлэх цэгээр саадгүй гарахад ашигладаг “бараг өдөр бүр солигддог нууц үг” өгдөг байсан гэжээ.

42 настай Васкес мөн Мексикийн албан тушаалтнуудад мөнгө төлж, мөрдөн байцаалтыг удаашруулж, нотлох баримтыг өөрчилж, ялыг хэрэгсэхгүй болгуулдаг байсан гэх.

Мексикийн Аюулгүй байдлын сайд Омар Гарсиа Харфучийн хэлснээр, Мехико хотын Эль Картель Нуэво Империо бүлэглэлийг үүсгэн байгуулсан Васкесийг Наукальпан хотод баривчлах тушаал гардуулах үед аюулгүй байдлын хүчнийхэн буудан хөнөөжээ. Тэрбээр аюулгүй байдлын хүчин рүү гал нээсэн бөгөөд 2024 онд Мехико хотын цагдаагийн дарга Милтон Моралесийн амь насыг хохироосон хэрэгт холбогдож байжээ.

Хууль зүйн яам мөн Мексикт амьдардаг АНУ-ын иргэн, бүлэглэлийн гишүүн 51 настай Роберто Гомест ял тулгажээ.

Прокурорууд түүнийг сүүлийн арван жил олон улсын гэмт бүлэглэлүүдэд хар тамхи нийлүүлж, Веддинг болон метамфетамин нийлүүлэгчийн хооронд 550 мянган ам.долларын үнэтэй 1000 фунт метамфетамины наймааг зуучлахыг оролдсон гэж буруутгаж байна.

Бүх ялаар буруутай нь тогтоогдвол Гомес хамгийн багадаа 10 жил, хамгийн ихдээ бүх насаараа хорих ял авах юм.

Веддингийн олон улсын хар тамхины сүлжээг мөрдөн шалгах явцад АНУ олон арван хүнийг баривчилжээ. Веддинг уг сүлжээг Синалоа картелийн хүрээнд удирдаж, хэд хэдэн аллага зохион байгуулсан гэж үзэж байна. Түүнийг хар тамхи наймаа, хүн амины зэрэг 17 хүнд гэмт хэрэгт буруутгаж байгаа бөгөөд тэрбээр гэм буруугаа хүлээгээгүй юм.